Májilis tóraǵasy Erlan Qoshanov búgin elordadaǵy №163 referendým ýchaskesinde daýys berdi.
Palata spıkeri «Qazaqstan temir joly» ǵımaratyndaǵy saılaý ýchaskesine kelip, elorda turǵyndarymen birge atom elektr stansıasyn salý máselesi boıynsha respýblıkalyq referendýmda óz tańdaýyn jasady.
«Búgingi referendým elimiz úshin mańyzdy kún, sondyqtan erekshe kóńil-kúıdemin. Bul – memleketimizdiń bolashaǵyna qatysty mańyzdy sheshim qabyldanatyn kún. Eń bastysy, osy sheshimdi halyq ózi qabyldap jatyr. Buǵan deıin qabyldanǵan Konstıtýsıalyq reforma arqyly ár azamattyń memleket saıasatyna belsene aralasýyna múmkindik jasaldy. Búgin osynyń naqty kórinisin kórip otyrmyz. Barlyq óńirlerde azamattarymyz óz daýystaryn berýde. Ár aımaqtan kelip jatqan aqparattarǵa qaraǵanda, halyqtyń belsendiligi óte joǵary. Memleketimizdiń bolashaǵy úshin halyq durys sheshim qabyldaıtynyna senimdimin», - dedi Májilis tóraǵasy.