Elimizde dene múshesin satýǵa ruqsat joq.
33 jastaǵy oraldyq azamat shetelge óz búıregin satpaq bolǵan. Ol otany Kenıa Respýblıkasynda jasaýǵa kelisken, dep habarlaıdy Almaty-akshamy.kz.
Polisia.kz-tiń aqparaty boıynsha, oraldyq azamat otany Kenıa Respýblıkasynda jasatý boıynsha mámile jasasqan. 30 shilde kúni BQO PD uıymdasqan qylmysqa qarsy kúres basqarmasy Kóliktegi PD UQQKB qyzmetkerlerimen birlesip, İİM-niń uıymdasqan qylmysqa qarsy kúres departamentiniń úılestirýimen adam organdaryn satý áreketi toqtatyldy.
Anyqtaý barysynda Oral qalasynyń 33 jastaǵy A. esimdi turǵyny, otbasyly azamat vahtalyq ádispen jumys isteıdi. Aqshalaı qarajattyń jetispeýshiligine baılanysty ol óziniń búıregin satpaq bolǵan. Mamyr aıynda atalǵan azamat halyqaralyq ınternet-saıtta jarıalanǵan aqshalaı syıaqy úshin transplantasıaǵa arnalǵan búırekti satý týraly habarlandyrýdy kórgen. Oǵan Telegram kanaly arqyly saıttyń qyzmetkerleri baılanysqa shyǵyp, ortaq mámilege kelý arqyly quny 20 myń AQSH dollaryn quraıtyn otany Kenıa Respýblıkasynda jasaýǵa kelisken.
2 aı boıy A. esimdi azamat medısınalyq ortalyqtarda tapsyrǵan taldaý nátıjelerin Telegram kanaly arqyly jiberip otyrǵan. Saıt qyzmetkerleri oǵan jol júrý, elektrondy vıza úshin 250 AQSH dollary kóleminde aqsha jibergen.
30 shilde kúni polısıa qyzmetkerleri atalǵan azamatty Almaty qalasyndaǵy áýejaıdyń ushý aımaǵynan ustady. Odan ári tergeý áreketterin júrgizý úshin azamat Oral qalasyna jetkizilip, eshqaıda ketpeý týraly qolhat berildi. Atalǵan fakti boıynsha QR QK-niń 116-baby 1-bóligine sáıkes, sotqa deıingi tergeý amaldary júrgizilip jatyr.
Aıta ketý kerek, Qazaqstanda organdardy satýǵa tyıym salynady jáne transplantasıalaý jasaýdyń jalǵyz joly — onyń týysynyń óteýsiz qaıyrymdylyǵy nemese qaıtys bolǵan adamnyń týystarynyń kelisimimen organdy transplantasıalaý.