Keńes 1414 baılanys ortalyǵy arqyly berilmek.
Qazaqstandyqtar búginnen bastap medısınalyq saqtandyrý jáne medqyzmetke qatysty konsýltasıalardy 1414 biryńǵaı baılanys ortalyǵy arqyly ala alady, dep habarlaıdy Almaty-akshamy.kz
Buǵan deıin bul qyzmetti Medısınalyq saqtandyrý qory janyndaǵy 1406 baılanys ortalyǵy atqaryp kelgen bolatyn.
MSQ Almaty qalalyq fılıaly dırektory Tileýhan Ábildaevtyń aıtýynsha, bul shara halyqqa qyzmet kórsetý aıasyn keńeıtip, operator azdyǵynan jaýap berilmeı qalǵan qońyraýlar sanyn qysqartý maqsatynda qolǵa alynyp otyr.
«Buǵan deıin turǵyndar 1406 nómirine habarlasyp, medısınalyq saqtandyrý, densaýlyq saqtaýǵa qatysty tegin konsýltasıa ala alatyn. Sonymen qatar, medısınalyq kómek sapasyna qatysty ótinish-shaǵymdar da osy baılanys arnasy arqyly qabyldanyp keldi. 1-maýsymnan bastap bul qyzmetti 1414 baılanys ortalyǵy kórsete bastaıdy. Sebebi ondaǵy operatorlar shtaty úlken jáne ortalyqtyń tehnıkalyq múmkindikteri joǵary. Ortalyqtyń bir ýaqytta kóptegen qońyraýlardy qabyldaýǵa múmkindigi bar. Bul óz kezeginde abonentterdiń operator jaýabyn kútýge ketetin ýaqytyn birneshe mınýttan bir mınýtqa deıin qysqartýǵa múmkindik beredi», - dedi Tileýhan Ábildaev.
Ótinishterdi burynǵysha Qordyń Qoldau 24/7 mobıldi qosymshasy, Telegram-bot (@SaqtandyrýBot) pen resmı veb-saıty arqyly da joldaýǵa bolady.
Bir aıta keterligi, 1414 operatorlary kún saıyn saǵat 9.00-den 20.00-ge deıin jumys isteıdi.