12 – mamyr Halyqaralyq meıirbıkeler kúni.
Qazirgi tańda elimizdiń densaýlyq saqtaý salasynda 187 myńnan astam orta býyndy medısına qyzmetkerleri qyzmet atqarady, dep habarlaıdy Almaty-akshamy.kz.
Bul kúnniń meıirbıkelik qyzmettiń alǵashqy uıymdastyrýshylarynyń biri bolǵan aǵylshyndyq meıirbıke Florens Naıtıngeldiń esimimen tikeleı baılanysty ekenin, onyń búginde kásiptik merekelerdiń qataryndaǵy eń bedeldi mereke ekenin de jaqsy bilemiz. Búgingi tańda Qazaqstanda 187 myńnan astam orta býyndy medısına qyzmetkerleri qyzmet atqarady. Sonyń qatarynda Almaty qalasynyń Alataý aýdany, «Zerdeli» yqshamaýdanynda ornalasqan № 29 qalalyq emhananyń halyq densaýlyǵyn jaqsartý isinde jan aıanbaı qyzmet atqaryp júrgen 165 meıirbıkesi de bar. Olar da ózderiniń kásiptik merekelerin saltanatty túrde atap ótip, aýdan turǵyndarynyń alǵysyna bólendi.
Eki jyl qatarynan kásibı biliktilik baıqaýynda birinshi jáne ekinshi oryndy ıemdengen №29 qalalyq emhana 53 myńǵa jýyq qala turǵyndaryna medısınalyq qyzmet kórsetedi. Osynsha turǵynnyń densaýlyǵyn baqylap, olardyń syrqatynan aıyǵyp ketýine meıirbıkelerdiń qosyp otyrǵan úlesi zor. Emhanadaǵy 10 «Densaýlyq mektebin» meıirbıkelerdiń júrgizetindigi de meıirbıkelerdiń óz jumystaryn derbes uıymdastyra alatyndyqtarynyń jarqyn mysaly bolsa kerek. Pandemıa kezinde barlyq tótenshe jaǵdaıǵa tótep bere alatyndyqtaryn isterimen dáleldeı bilgen emhana dárigerlerimen qatar, meıirbıkelerge de úlken jaýapkershilik júktelgeni belgili. Sol eńbekteriniń nátıjesinde emhananyń 15 qyzmetkeriniń esimderi qaladaǵy kórnekti oryndarda ornalasqan Alǵys taqtasyna jazylyp ilindi. Al emhanaǵa kelgen árbir naýqas Baqyt Ótepova, Nurgúl Tıkembaeva, Toty Saǵyndyqova, Móldir Kalıakova, Ásel Óteǵulova, Rozgúl Sakıeva sekildi qoldary shıpaly, emderi daýa meıirbıkeler men orta býyndy medısına qyzmetkerleriniń qyzmetine dán rıza.
«Qazir densaýlyq saqtaý salasynda meıirbıkelerge úlken jaýapkershilik júktelip, orta býyndy medısına qyzmetkerlerin daıyndaýdyń jańa modelderi engizilýde. Buryn biz meıirbıkelerge dárigerlerdiń taǵaıyndaýlaryn oryndaýshy retinde ǵana qarap kelsek, búginde olar dárigerlerdiń teń seriktesterine aınalyp, dárigerlerden derbes qabyldaýdy, dınamıkalyq baqylaýdy, aqyl keńes beretin, aýrýlardy basqarý baǵdarlmasy sheńberinde oqytý jáne patronajdy qyzmetti júzege asyratyn, skrınıngtik tekserýlerdi, vaksınasıalaý jáne basqa da birqatar dıagnostıkalyq em-sharalardy júzege asyrý múmkindigine ıe bolyp otyr. Kishi meıirbıkeden bastap, meıirbıke isi boıynsha RHD doktoryna deıin Meıirbıke isi mamandyǵyn daıarlaýdyń kópdeńgeıli júıesi engizildi. Jumys isteıtin meıirbıkeler úshin jedeltetilgen jáne ıkemdi daıarlaý baǵdarlmalary boıynsha joǵary jáne orta bilimnen keıingi medbıkelik bilim alýǵa múmkindik beretin akademıalyq jáne qoldanbaly bakalavrıattyń biriktirilgen baǵdarlamasynyń, «Medbıke isinde bilim, tájirıbe jáne ǵylymnyń úshtuǵyrlyǵy» Jol kartasynyń qabyldanýy, olardy densaýlyq saqtaý saıasatyn aıqyndaý máselelerine tartý, meıirbıkeler arasynda kóshbasshylyq áleýetti damytý da meıirbıke isiniń mártebesin arttyra túsýde. Sondyqtan men Halyqaralyq meıirbıkeler kúninde emhananyń barlyq meıirbıkeleri men qalamyzdyń densaýlyq saqtaý salasynda qyzmet atqaryp júrgen barlyq orta býyndy medısına qyzmetkerlerin de merekelerimen quttyqtaımyn. Biz úshin eń úlken marapat– emdelýshilerdiń alǵysy. Sol kóptiń alǵysyna bólene berińizder»,- deıdi Almaty qalalyq №29 emhananyń bas meıirbıkesi, joǵary sanatty meıirbıke Elmıra Aıtqadyrqyzy Ábıeva.
Merekelerińiz qutty bolsyn, meıirimdi meıirgerler!