12 Mamyr – Halyqaralyq Meıirbıkeler kúni.
Almaty qalalyq Qan ortalyǵynyń joǵary sanatty meıirgeri Aınur Álmesova óz mamandyǵyn qalaı tańdap kelgenin aıtty, dep habarlaıdy Almaty-akshamy.kz.
Ár adamnyń bolashaqta kim bolatynyn onyń balalyq shaqtaǵy oıynynan baıqaýǵa bolady desek, Almaty qalalyq Qan ortalyǵynyń qan jáne onyń komponenetterin daıyndaý bóliminiń aǵa meıirgeri Aınur Kenebaıqyzy Álmesova óziniń aq halatty abzal jan bolǵysy keletinin sol bala kezinen-aq tóńiregine baıqatatyn. Ózge qyzbalalar qýyrshaq oınaýǵa jaqyn bolsa, kishkentaı Aınur kerisinshe, sol qýyrshaqtardy tekserip, dári jazyp berip oınaıtyn-dy. Keıin óse kele de sol oıyny úlken armanǵa aınalǵan ol «óskende kim bolasyń?» degen saýalǵa dáriger bolamyn dep jaýap beretin.
Mektep bitirgen jyly medısınalyq ýnıversıtetke qujat tapsyrǵan, biraq oǵan túsý úshin joǵary bal jınaý qajet bolǵandyqtan baıqaýdan óte almady. Áıtse de qaısar qyzdyń oǵan taýy shaǵyla qoıǵan joq, Almaty qalasyndaǵy «Aıajan» medısınalyq kolejine qujat tapsyryp, baq synap kórmek bolǵan onyń joly bolyp, «Meıirbıke isi» bólimi boıynsha oqýǵa qabyldandy. Sondaǵy Aınurdyń qýanyshyn sózben aıtyp jetkizý múmkin emes edi, bala kezde qýyrshaqqa ýkol salyp oınaıtyn Aınur qyz endi qýyrshaqtardyń emes, naýqas adamdardyń syrqatynan saýyǵyp ketýine sebepker bolatyn meıirbıke bolatynyna qýanǵan. Sodan beri de zymyrap jıyrma jyl óte shyǵypty. Aınur ózi qalaǵan mamandyǵy boıynsha abyroıly qyzmet atqaryp keledi.
Aınurdyń qolynan em-shara qabyldaǵan naýqastar oǵan únemi «Aınalaıyn, qolyń jeńil eken, emiń dertimizge shıpa bolsyn» dep alǵys aıtqanda ol meıreılene túsetin. Birde onyń qurbysynyń týysy naýqastanyp, Qalalyq qan ortalyǵyna qan tapsyrýǵa kelgen bolatyn, ortalyqtaǵy meıirbıkelerdiń jumysy, ortalyq qyzmetkerleriniń kelgen adamdarǵa degen yqylastary ony birden baýrap alǵany. Ertesi kúni Qan ortalyǵynyń kadrlar bólimine jolyǵýtýraly sheshim qabyldady. Joly bolyp ketti. Bala kútimine baılanysty demalysqa ketken bir meıirbıkeniń orny ýaqytsha bos eken, ol ýaqytsha bolsa da sol orynǵa jumys isteı turýǵa kelisken Aınur ertesine-aq Ortalyq qyzmekterlerimen burynnan birge jumys istep kele jatqandaı tez baýyr basyp ketti. Táýligine qanshama adam et jaqynynyń ómirin saqtap qalý úshin qan berý arqyly kúresse, júreginiń tamyrlary adamgershilik qaǵıdalarymen órilgen erikti donorlardyń ózi tanyp bilmeıtin adamdardyń ómirin saqtap qalý jolynda qan berip, bireýge ómir syılap jatqanyn kórgen Aınurǵa bul Ortalyq qaıyrymdylyq ortalyǵy sıaqty kóringen.
Oǵan Qańtar oqıǵasy kezindegi erikti donorlardyń qaısarlyǵy taǵy kózin jetkizdi. Qan donorlary ózderiniń ómirlerine qaýip tónip turǵanyna qaramastan, jaralanǵan jaýyngerlerimizdiń, polısıa qyzmetkerleri men beıbit turǵyndardyń ómirin saqtap qalý úshin qan tapsyrýǵa úzdiksiz kelip jatty. Al sol oqıǵa kezinde Ortalyq qyzmetkerleriniń ózderi de bastama kóterip, qan tapsyrǵan bolatyn. Iyǵyna aq halat ilgen adam úshin qaıyrymdylyq jasaýdan asqan saýapty is bolmasa kerek.
Sóıtip, 2010 jyly Almaty qalalyq Qan ortalyǵyna donor bolyp kelgen Aınur ortalyqtyń medısınalyq meıirbıkesi laýazymy boıynsha jumysqa qabyldanyp, birjola osy ortalyqta qalyp qoıdy. Óz jumysyna jaýapty, kásibin jetik meńgergen Aınur Kenebaıqyzy Álmesova qazirgi kúni Ortalyqtyń eń úzdik meıirgerleriniń biri. Ózi ýaqytsha jumysqa qabyldanǵan Qan jáne onyń komponentterin daıyndaý bóliminiń aǵa medısınalyq meıirbıkesi. Ortalyqtaǵy Meıirbıkeler keńesiniń múshesi. Jańadan jumysqa qabyldanǵan jas mamandarǵa bilgenin úıretýden jalyqpaıtyn tálimdi tálimger.
«Maǵan meıirger degen sóz qatty unaıdy. Meıirger degen sóz udaıy ymeniń júregime meıirimdilik nuryn seýip turatyndaı, sondyqtan bolar mamandyǵymdy maqtan tutamyn»,– deıdi Almaty qalalyq Qan ortalyǵynyń joǵary sanatty meıirgeri Aınur Álmesova.
Udaıy ózin kásibı jaǵynan jetildirip, bilim-biliktiligin arttyryp otyratyn Aınur Álmesova óziniń áriptesterimen qatar, Halyqaralyq meıirbıkeler kúnin qyzmetindegi jetistikterimen, ujymdaǵy asqan abyroıymen qarsy aldy. Eń qýanyshtysy mereke qarsańynda ol «Amanat» partıasynyń múshelegine qabyldanyp, bastaýysh partıa uıymynyń Alǵys hatymen marapattaldy. Ujymnyń bul qurmeti onyń óz jumysyna degen jaýapkershiligin burynǵydan da arttyra túskeni anyq.