1 jeltoqsan - QR Tuńǵysh Prezıdenti kúni
Búgin – Qazaqstan Respýblıkasynyń Tuńǵysh Prezıdenti kúni, dep habarlaıdy Almaty-akshamy.kz QazAqparatqa silteme jasap
Aıtýly data osydan 10 jyl buryn, naqty aıtsaq, 2011 jyldyń 10 jeltoqsanynda QR Parlamenti Senaty depýtattarynyń bastamasymen bekitilgen bolatyn.
«Qazaqstan Respýblıkasyndaǵy merekeler týraly» QR Zańyna tolyqtyrý engizilip, 1 jeltoqsan - Qazaqstan Respýblıkasynyń Tuńǵysh Prezıdenti kúni dep belgilendi.
1991 jyldyń 1 jeltoqsanynda Nursultan Nazarbaev táýelsiz qazaq eliniń tuńǵysh Prezıdenti retinde qyzmetke kiristi. Atalmysh merekeniń 1 jeltoqsan saıyn toılanýynda osyndaı mán bar. KSRO ydyraǵan tusta táýelsizdigin jarıalaǵan Qazaqstannyń tuńǵysh Prezıdenti bolǵany eskerilip, sol tusta qolǵa alynyp, júzege asqan túrli bastamalar men reformalar, memleket qurý jolynda jasalýy tıis standartty sharalardyń bári Elbasy esimimen birge atalyp júr.
Araǵa ǵasyrlar salyp, memlekettiligin qaıtarǵan qazaq eliniń alǵashqy basshysy bolǵanyna oraı, tuńǵysh Prezıdent erekshe quqyqqa ıe tulǵa bolyp sanalady. Onyń táýelsizdiktiń eleń-alań shaǵynda atqarǵan qyzmeti zańnamalyq turǵydan joǵary baǵasyn alǵan. «Tuńǵysh Prezıdent», «Elbasy», «Ult kóshbasshysy» degen resmı mártebeleri bar.
Nursultan Nazarbaevtyń Qazaqstan tarıhyndaǵy orny týraly qalam terbeıtin keıbir tarıhshylar men saıasattanýshylar eldegi eń súıekti jobalar men eleýli tarıhı oqıǵalardyń báriniń bastaýynda Elbasy turǵanyn jazyp júr.
Atap aıtsaq, QR Qarýly Kúshteriniń qurylýy, shekaranyń delımıtasıasy men demarkasıasy, ulttyq valúta – teńgeniń aınalymǵa shyǵýy, el astanasynyń Almatydan Aqmolaǵa aýystyrylýy, Semeı ıadrolyq synaq polıgonynyń jabylýy, ulttyq altyn-valúta qorynyń qurylýy, Konstıtýsıanyń birneshe ret jetildirilýi, Eýrazıalyq jeonomıkalyq odaqtyń qurylýy jáne oǵan Qazaqstannyń múshe retinde kirýi sıaqty oqıǵalardy Elbasynyń eńbegi retinde baǵalaý úrdisi bar.
Qazaq eliniń damý baǵytyn aıqyndap otyrǵan «Qazaqstan-2050» strategıasy da Elbasynyń bastamasymen qabyldanǵan. 2019 jyldyń 19 naýryzynda Nursultan Nazarbaev óziniń Prezıdenttik ókiletin qazirgi Prezıdent Qasym-Jomart Toqaevqa tabystady. Osy oqıǵanyń aıasynda Astananyń ataýy Tuńǵysh Prezıdenttiń atyna Nur-Sultan bolyp aýystyryldy.