Qurmanǵazy atyndaǵy Qazaq ulttyq halyq aspaptar orkestri – Qazaqstandaǵy aspaptyq mýzyka óneri tarıhyndaǵy alǵashqy kásibı jáne biregeı orkestr.
Ujym búkil álemge qazaqtyń mádenıetin, kórkem ónerin, teńdesi joq dala sazy men erekshe aspaptaryn tanystyryp keledi, dep habarlaıdy Almaty-akshamy.kz.
Orkestrdi 1934 jyly Ahmet Jubanov qurǵan. Ár jyldary ujymdy daryndy mýzykanttar - Shamǵon Qajyǵalıev pen Nurǵısa Tilendıev basqardy. Olar Jubanovtyń isin jalǵastyryp qana qoımaı, repertýardyń baıýyna óz úlesin qosty.
1944 jyly orkestrge qazaqtyń uly kúıshisi Qurmanǵazy Saǵyrbaıulynyń esimi berildi. Orkestr 1967 jyly Qazaqstannyń eńbek sińirgen ujymy, 1978 jyly Akademıalyq orkestri ataǵyn ıelendi. 1984 jyly Orkestr «Halyqtar Dostyǵy» ordenimen marapattaldy, 2020 jyly Qazaqstan Respýblıkasy Prezıdentiniń Jarlyǵymen «Ulttyq» mártebe berildi.
Búginde orkestr ujymynda 135 adam eńbek etip jatyr. Bir jyl ishinde orkestr 100-den astam konsert berdi, kórermen sany 45000 adamǵa jetti. Al mýzykanttardyń repertýarlyq qory 5000-nan astam shyǵarmaǵa deıin jetedi.
Mereıtoıǵa oraı Qazaqstanda da, shetelde de birqatar is-sharalar josparlanyp otyr. Mýzykalyq ujym Túrikmenstanǵa baryp, Ashhabad kórermenderiniń aldynda óner kórsetip, olarǵa qazaq halyq mýzykasynyń mol murasymen tanystyrady.
Mereıtoılyq týr aıasynda orkestr Qaraǵandy men Qostanaıda jarqyn ári este qalarlyq shyǵarmalaryn tartý etedi.
Merekeniń qorytyndy keshinde qazaq mýzykasynyń klasıkalyq týyndylary men jańa kompozısıalar oryndalatyn gala-konsert ótedi.