Premer-mınıstr Oljas Bektenov óńirdegi sheneýnikterge eskertý jasady, - dep habarlaıdy almaty-akshamy.kz.
Oǵan sebep – jylytý maýsymyna daıyndyqtyń tómendigi.
"Qazir – aldaǵy jylytý maýsymyna daıyndyqtyń naǵyz qyzǵan shaǵy. Jazdyń birinshi aıy da aıaqtalýǵa jaqyn. Alaıda jylý obektilerindegi jóndeý merzimderiniń saqtalmaýy alańdaýshylyq týǵyzyp otyr", - dedi Oljas Bektenov Úkimet otyrysynda.
Premer-mınıstr naqty mysaldar keltirdi:
- Ekibastuz jylý ortalyǵynda jóndeý jumystaryn bastaý merzimi mamyrdan maýsymnyń sońyna aýystyrylǵan.
- Temirtaýda №2 Jylý ortalyǵyndaǵy 2-qazandyqty jóndeý jumystary sáýirden beri bastalmaı tur. Ondaǵy týrbınalardy kúrdeli jóndeý jumystary da aıaqsyz qalýy múmkin.
- 13 mamyrda bastalýǵa tıis bolǵan Tarazdyń №4 jylý-elektr ortalyǵyndaǵy №1 týrbınany jóndeý jumystarynan da áli kúnge mardymdy habar joq.
- Jezqazǵandaǵy jylý-elektr ortalyǵynyń №5 qazandyǵy maýsymnan bastap qana jóndeýge qoıyldy. Jeke jabdyqty jóndeý jumystaryn tipti jyl sońynda aýystyrý josparlanýda.
"Aıta bersek, mundaı mysaldar kóp. Elimizdiń barlyq óńirinen keltirýge bolady. Bıyl mamyrdyń basynda Úkimet otyrysynda jóndeý merzimderin uzartýǵa jáne olardyń kólemin azaıtýǵa bolmaıtynyn tapsyrǵanmyn. Alaıda operator KEGOK bekitken jóndeý jumystarynyń kestesin menshik ıeleri óz betinshe ózgertýin doǵarmaı otyr.
Bıyldyń ózinde ǵana jóndeý jumystaryn aýystyrý boıynsha kestege 18 ret ózgeris engizilgen. Oǵan ákimdikter men Energetıka mınıstrliginiń kelisimi de alynbaǵan. Iaǵnı atalǵan faktiler baqylaýdyń jetkiliksiz ekenin kórsetip otyr", - dedi úkimet basshysy.
Osyǵan baılanysty ol óńirdegi sheneýniktergi eskertý jasap, orynbasaryna tapsyrma berdi.
"Sondyqtan Roman Sklár meniń tapsyrmam boıynsha problemasy kóp obektilerdi aralap júr. Taıaýda ǵana Qaraǵandy oblysyna baryp keldi. Roman Vasılevıch, jalpy jergilikti jerlerde shuǵyl sheshimder men barynsha qatań sharalardy qabyldańyz. Jóndeý jumystarynyń sapasyna erekshe nazar aýdarýdy suraımyn", - dedi Oljas Bektenov.
Sondaı-aq premer-mınıstr jylý jelilerin jańǵyrtý qarqyny da tómen ekenin atap ótti.
"Ázirge josparlanǵan jumys kóleminiń 25 paıyzy da oryndalǵan joq. Basqa óńirlermen salystyrǵanda Aqmola, Aqtóbe, Atyraý jáne Mańǵystaý oblystarynda jylý jelileriniń daıyndyǵy tómen.
Jylý jelilerin jańǵyrtý jumystary negizinen respýblıkalyq búdjet qarajaty esebinen ǵana júrgizilip otyrǵanyn aıta ketý kerek. "Tarıfti ınvestısıaǵa aıyrbastaý" baǵdarlamasynyń múmkindigin tolyq paıdalanbaı otyrmyz. Jalpy jylytý maýsymyna daıyndyq jumystarynyń tıimdiligi tómen", - dep sózin túıindedi úkimet basshysy.