Halyq ártisi Bıbigúl Tólegenova 95 jasqa toldy, dep habarlaıdy aqshamnews.kz 24.kz-ke silteme jasap.
Ǵıbratty ǵumyr ıesi 70 jyldan astam sahnanyń sánin keltirdi. Ult maqtanyshy Bıbigúl Ahmetqyzynyń repertýary óte baı. Onyń tumadaı tunyq únin talaı býyn tyńdap ósti. Bıbigúl Tólegenova halqyn ásem ánimen de, sulý sánimen de qashanda qýantýmen kele jatqan tulǵa. Álemdik deńgeıdegi opera juldyzy óziniń ónerdegi asa joǵary jetistikteri úshin ǵana emes, halyq arasynda úlken súıispenshilikke ıe bolǵandyqtan da halyq ártisi atanǵan jan. Ánshiniń án qorjynynda halyq shyǵarmalarymen qatar álemdik mýzyka jaýharlary da kóptep kezdesedi.
Bıbigúl Tólegenova, Qazaqstan jáne KSRO halyq ártisi:
- Eń birinshi meni el daýsymdy radıodan estıtin. Keıin men konsertke shyǵa bastaǵannan keıin bári qyzyqtaıdy ǵoı, qandaı eken dep. Men aýyl eńbekkerlerin, malshylar, eginshilerdi kóp araladym. Tipti áriptesterim maǵan «kolhoznaıa pevısa» dep aıtatyn. Men aıttym, za to kolhoz bizdi asyrap jatyr, kıindirip jatyr, tamaq berip jatyr. Biz olarǵa rýhanı azyq berýge mindettimiz dep. Men erinbeı aýylǵa shyǵyp, aýylda júrdim kóp.
Bıbigúl Ahmetqyzyn álemniń ónersúıer qaýymy árqashan qushaq jaıa qarsy alady. Onyń ánderine Nú-Iork, London, Parıj, Rım syndy álemniń iri qalalarynyń aıtýly konsert zaldaryna jınalǵan jurt tamsana qol soqqan. Opera ánshisi Shvesıadaǵy alǵashqy saparynda «Bulbul» ánimen kórermenniń ystyq yqylasyna bólengen. Óner ıesine 15 jyldan soń sol elde qaıta án shyrqaý buıyrǵan.
Bıbigúl Tólegenova, Qazaqstan jáne KSRO halyq ártisi:
- Ekinshi barǵanda men «Gákkýdi» aıttym, birsypyra halyq ánderin aıttym. Zalda maǵan «nasgen, nasgen» dep aıǵaılady. Men oıladym, bularǵa ne kerek dep. Sosyn bir shaǵyn ǵana jastar kelip: «Biz sizden «Bulbuldy» suradyq, siz osydan 15 jyl buryn sony aıtyp edińiz, sondaı ádemi án, estigimiz keledi», - dedi. «Biz sizge aıqaıladyq, alystan», - deıdi. Men shvedtiń tilin bilmeımin dedim. Sóıtip, 15 jyldan keıin men barǵannan keıin olar bulbuldy qaıta surap jatyr. Bizdiń ulttyq mádenıetimizdi nasıhattaǵanymyzdyń paıdasy sol.
Qazaq án óneriniń bulbuly Bıbigúl Tólegenovanyń oryndaýyndaǵy ańyzǵa aınalǵan ánder qazaq óneriniń shejiresi ispettes. Kúmis kómeı ánshiniń 95 jyldyq mereıtoıyna oraı uıymdastyrylǵan shyǵarmashylyq keshke ónersúıer qaýym men shákirtteri túgeldeı qatysty.