Qadir túni – Ramazan aıynyń sońǵy on túniniń biri. Iaǵnı, on túnniń birine jasyrylǵan. Al 27-shi tún – Qadir túni bolýy eń yqtımal tún.
Qadir túni qashan?
Bıyl 23 naýryzda bastalǵan qasıetti Ramazan aıy 20 sáýirde aıaqtalady. Al myń aıdan da qaıyrly Qadir túni sáýir aıynyń 17-nen 18-ne qaraǵan túnge túsip tur.
Aılardyń sultany Ramazan aıy bolsa, túnderdiń eń qasıettisi Qadir túni sanalady. Óıtkeni bul túni Quran Kárimniń aıattary túse bastaǵan.
Qadir túni jasalǵan ǵıbadat 83 jyldyq saýapqa para-par. Jalpy, «Qadir» degen sózdiń ózi arab tilinen «taǵdyr» degen maǵyna beredi. Sol sebepti bul túnde adamnyń bir jyldyq taǵdyry ǵana emes, rızyq-nesibesi de jazylady.
Qadir túniniń belgileri
Qadir túniniń belgileri jaıynda paıǵambarymyz: «Qadir túninde aspan ashyq bolady. Ystyq ta, sýyq ta bolmaıdy. Kún qyzyl bolyp shyǵady», – degen.
Taǵy bir hadıste: «Qadir túni tunyq ári jaryq bolyp, aıdyń ózi beıne bir nurǵa toly bolady. Ol tún sýyq ta ystyq ta emes, tynysh ta jaıly bolyp, tań atqansha juldyzdardyń aǵyp túsýine tyıym salynady. Bul túnniń taǵy bir belgisi, tańerteń kún sáýlesi, tolǵan aı sekildi túzý bolyp shyǵady ári shaıtandarǵa kúnmen birge jarysa shyǵýlaryna ruqsat etilmeıdi»- delingen.
Sondaı-aq qasıetti túnde bult ta, jańbyr da, jel de bolmaıdy.
Qadir túni ne isteý kerek
Ókinishke qaraı, kóbi Qadir túnin jaı ǵana uıyqtamaı qarsy alý jetkilikti dep sanaıdy. Alaıda bul qate túsinik. Allanyń meıiriminen úmit etken árbir adam Qadir túni kirmesten buryn dáret alyp, taza kıim kıip, ústine hosh ıisti átir seýip, qasıetti túndi kútýge daıyndyq jasaýǵa tıis.
Qadir túni maqsat – tek uıyqtamaı, oıaý júrý emes, tilek tilep, duǵa jasap, namaz oqý.
Qasıetti túndi kóńil kóterý oryndarynda emes, úıde nemese meshitte ótkizgen abzal. İshimdik ishýge, adamdardyń syrtynan ǵaıbattap, ósek aıtýǵa, janjaldasýǵa, daýlasýǵa tyıym salynady. Dostarmen kóńil kóterip, án aıtýǵa, bıleýge, saýyq keshin uıymdastyrýǵa bolmaıdy. Al teledıdardan oıyn-saýyq baǵdarlamalary men fılmderdiń ornyna tárbıelik máni bar dúnıelerdi tamashalaǵan durys.
Qadir túniniń qurmetine dastarhan jaıýdyń qajeti joq. Úıge jaqsylyq kiredi dep esik-terezelerdi ashyp qoıý da – qate.
Musylmandar bul túndi barynsha qulshylyqpen, shyn júrekten ókinip, kúnálary úshin keshirim suraýmen ótkizýge tıis. Tańǵa deıin Qasıetti Quran kitabyn oqyp, duǵa jasaǵan abzal.
Qadir túni oqylatyn duǵalar
Aısha (r.a.) anamyz Paıǵambarymyzdan (s.ǵ.s) : «Ýa, Allanyń elshisi, Qadir túninde qandaı duǵa jasaıyn»,- dep suraǵanda, Alla elshisi: «Ýa Allam! Sen keshirimdisiń, keshirýdi súıesiń, meniń kúnálarymdy keshire gór», - dep duǵa etýge keńes bergen.
Qadir túniniń qurmetine Rabbymyzdan barsha musylmannyń amandyǵyn, ózara dostyq pen baýyrmashyldyqtyń artýyn, Islam áleminiń birtutastyǵy men kúlli adamzatty apattardan saqta dep tileýimiz shart.
Qadir túni qaı ýaqytqa deıin jalǵasady
Qadir keshi kún batyp, aýyz ashqan sátten bastap tań atatyn ýaqytqa deıin jalǵasady.