*Satıra sardarynan sarqyt
Qarǵa Japalaqqa ishken-jegenin aıtyp, masaırap otyrǵanda, kók aspan órt qoıǵandaı shatyrlap ala jóneldi.
– Oıbaı, aspannan tas qulap keledi! – dedi Japalaq sonaý zeńgir kókten zeńbirektiń oǵyndaı sarqyrap kele jatqan Qyrandy kórip.
– Tastan sadaǵa ketsin, Búrkit degen qoıanshyq osy bolady. Qyryqqa kelgenshe qyryqqa deıin san bilmeıdi de, erteden qara keshke deıin aspan men jerdiń ara qashyqtyǵyn ólsheımin dep áýre. Bala kúnimizde-aq álemdi qattap-shottap, esebin alyp qoıǵanbyz. Jer men kóktiń arasy pálenbaı shaqyrym desem, senbeıdi. Keýdesi syryldap, quıryǵy shuryldaǵansha kózjetpes kókke shyǵady da, qaıta burylyp, «bir, eki, úsh...» dep sanaı bastaǵanda-aq basy aınalyp, osylaı domalaıdy. Ólsin, qyztalaq! – dep Qarǵa tisiniń arasymen shyrt túkirip qoıdy.
Osy kezde jer-álemdi kóshirip sarqyrap kele jatqan Qyran qyr astyna jaıdyń oǵyndaı shanshyla túsken edi.
– Júrshi, baryp keleıik! – dedi ólgen, qıraǵan, buzylǵan, jarylǵandy qyzyq kóretin Japalaq.
– Qoı, qurysyn, Japeke, báleden aýlaq! «Qarǵa Búrkitti sabap ketipti» degen sózge qaldyrmaqsyń ba? «Tek júrgeniń teńge, aǵań úılense jeńge» deıdi bizdiń qarǵalar. Teńgeń bolsa, jeńgeń bolsa, daýda neń bar? Baıaǵy bala kezde bir Búrkitti shapalaqpen tartyp jiberem dep, sózge qalǵanym bar.
Qarǵa Qyran attanǵansha ymdy bilmes Japalaqty áńgimege aınaldyryp, bógeı turmaqshy edi.
– Alaıda óz baýyryńdy jamandaǵanmen, bireý saǵan jaqsy baýyryn bere me? Qansha aıtqanmen, túbimiz bir. Ákem marqum toqsanǵa kelgende, toqaly taýyp bergen eken osy Búrkitti. Toqaldan týǵan bala qaıbir ońǵan deısiń? Esi bolsa, jer men kóktiń arasyn ólshegenshe, aýzy men quıryǵynyń arasyn ólshep bilip alar edi. Qudaı jyndy ǵyp qoıǵan soń, ne shara. Aman bolsyn áıteýir. Bárinen bar jaqsy, – dedi Qarǵa ezýine qatqan birdemesin alyp tastap.
Osy sátte toıattaǵan Qyran qyr astynan qıalaı shyǵyp, asqar taýlarǵa qaraı bet aldy. Qarǵanyń manadan bergi ıegi qyshyp, sarǵaıa kútip otyrǵan shaǵy osy edi.
– Syıly qonaq kele qalǵandaı bolsa, óle qalǵandaı bolmaı, soıyp berem be dep baılap otyrǵan bir tý túlkim bar edi, jańaǵy jerólshegish qoıanshyq jep ketpese ekeýmiz bir sorpalanaıyq, júrińiz, Japeke, – dep qyrǵa qaraı qalbań-qulbań etip usha jóneldi.
– Báse, aıttym ǵoı, jep ketipti! – dedi Qarǵa qardyń ústinde qyp-qyzyl shıedeı bop jatqan qandy kórip. – Túbimiz bir dep osy tentek-aq túbime jetetin boldy. Toqaldan týǵan teksiz ıt, kók tıyn tabysy joq, eki kózi meniń malymda. Qaıta qaldyrypty. Kel, Japeke, otyra qal da, oba ber.
Ekeýi áli býy burqyrap jatqan semiz túlkiniń qyzylyna tumsyqty da, tyrnaqty da saldy.
Qyrannyń qaldyǵyn jep, sarqytyn iship kún kórip júrgen sorly qarǵa anaý-mynaý dep ósektemeı-aq Qyrandy Qyran dese, taǵynan taıyp qalmas edi, qaıtesiń?..
Ospanhan ÁÝBÁKİROV