Oraza ústindegi oı
On segiz myń ǵalamnyń ıesi Alla-Taǵala adam balasyn Haýa ananyń qursaǵynda bir tamshy sýdan jaratqanda, bir perishtege ámir berip: «Men ulyq qyp, erekshe sanaly ǵyp topyraqtan jaratqan adamnyń urpaǵy anasynyń qursaǵynda jatqanda, jyn-peri ıektep, múgedek, kemtar qylyp júrmesin, jaryq dúnıeniń esigin ashqansha kúzetip turýdy saǵan amanat etemin», – depti.
Aıy, kúni tolǵan soń da, náresteniń ana qursaǵynan shyǵatyn syńaıy baıqalmapty. Tipti kúzetshi-perishtege: «Men myna jyly da jaıly jerden eshqaıda shyqpaımyn. Jaryq dúnıede ne jaqsylyq bar? Ystyq-sýyqqa kúıip-tońyp, bir aıaq asqa bola ketpen arqalap, azapqa túskenshe, osynda jatqanym artyq», – dep salypty. Perishte óz qyzmetin támam qylǵanyn, biraq náreste ana qursaǵynan shyqpaı jatyp alǵanyn Jaratýshyǵa baıan etedi. Sonda Alla-Taǵala aıtqan eken: «Iá, perishtem, ózińe tapsyrǵan qyzmetti adal atqardyń. Endi peıishke bar da, odan bir ýys dán alyp, bir túıirin jańaǵy nárestege ber. Ol dánniń dámin tatyp kóredi de, taǵy suraıdy, sol kezde dándi kórsetseń, jaryq dúnıege shyǵýǵa ózi-aq áreket jasaıdy».
Perishte peıishke baryp, Alla-Taǵalanyń ámirin oryndap, bir ýys dán alyp keledi. Bir túıirin náresteniń aýzyna salady. Ol taǵy suraǵanda, dán ustaǵan qolyn ózine qaraı tartyp, soza beripti. Osylaı amalyn taýyp, náresteni jaryq dúnıege shyǵarǵan perishte ýysyndaǵy dándi qulashy jetken jerge deıin shashyp jiberse kerek. Sol dánder – adam balasynyń rızyǵy eken. Ár pende sol rızyq-dándi terip, ómir súredi deıdi.