Búgin fýtboldan ulttyq qurama úshin mańyzdy oıyn.
Jerlesterimiz «Astana-Arena» alańynda Fınlándıa fýtbolshylaryn qabyldaıdy. Qos komanda 9 upaımen Eýropa chempıonatyna irikteý týrnıriniń H tobynda kósh basynda keledi. Qazaqstan quramasynyń kapıtany Asqat Taǵybergen oıynshylar machqa tas-túıin daıyn ekendigin aıtady. Al komandanyń bas bapkeri Magomed Adıevtiń pikirinshe, Fınlándıa taktıkalyq oıynǵa basymdyq beredi. Alaıda Adıev shákirtteri qarsylas komandanyń oıynyn saralap, óz josparyn túzgen. Buǵan deıin Qazaqstan men Fınlándıa tórt márte kezdesti. Tórteýinde de ulttyq qurama utylǵan edi. Degenmen, osy joly eseni qaıtarýǵa múmkindik bar. Astana-Arenadaǵy jankúıerler qoldaýy da jigitterge jiger bereri sózsiz. Keshke stadıonda ıne shanshyr oryn bolmaıdy. Sebebi, 30 myń bılettiń bári de eki apta buryn satylyp ketken. Jaqynda ǵana Túrkıanyń Beshiktash klýbyna aýysqan Bahtıer Zaınýtdınov ta qurama sapynda.
«Qazir quramadaǵy kóńil-kúı jaqsy. Jastar da tájirıbeli oıynshylar da qatarymyzda. Fınlándıa quramasynyń oıyndaryn kórdik. Óte myqty komanda. Tartysty kezdesý bolady dep oılaımyn. Jankúıerlerdiń qoldaýyn sezip jatyrmyz. Solardy qýantý úshin jaqsy nátıjege qol jetkizýge tyrysamyz», - deıdi Ulttyq qurama fýtbolshysy Bahtıer Zaınýtdınov.
Mach keshki saǵat 20.00-da bastalady. Ulttyq qurama oıynyn «Qazsport» arnasynan tikeleı efırde tamashalaýǵa bolady.