Ataýly kún dúnıejúzinde 1962 jyldan beri toılanady. Osy rette teatr týraly qyzyq derekterge qulaq túrińiz. Álemde bılet alý júıesi erekshe teatr bar. Ol AQSH-tyń Vırdjınıa shtatynda. «Barter Teatryna» kirý bıletin aqshaǵa emes, tamaqqa aıyrbastap alady. Al ejelgi ýaqytta Sısılıada bir jylǵa sozylatyn qoıylymdar sahnalanǵan eken. Kórermender kún saıyn keshke taman qoıylymnyń jalǵasyn kórý úshin teatrǵa jınalatyn bolǵan. Estimegen elde kóp degen osy.
Búgin - halyqaralyq teatr kúni. Aıtýly data dúnıejúzinde 1962 jyldan beri toılanady. Sahna sańlaqtarynyń kásibı merekesi kúlli teatr súıer qaýymǵa ortaq. Sulýdyń kóz jasyndaı móldir ónerdiń tunyǵyn laılamaı, kóptiń kóńilinen shyǵyp júrgen ujymdar bizdiń elde de az emes. Solardyń biri - astanadaǵy «Jastar» teatry.
«Jastar» teatry Astana ákimdiginiń qoldaýymen 2007 jyly quryldy. Sodan beri munda talaı talantty jas qarymyn shyńdady. Úlken sahnanyń kıesin sezip, bekzada ónerge alǵashqy qadamyn jasady. Solardyń biri - Ádil Ahmetov. Qabiletimen qalyń jurtshylyqty baýraǵan jas akter juldyzyn jaqqan orta osy shańyraq dep sanaıdy.
- Buryn sahnada 20 akter, al kórermen sany 15 bolǵanda óner kórsetken kezder boldy. Qazir jer men kókteı, - deıdi «Jastar» teatrynyń ártisi Ádil Ahmetov.
Ádil sekildi 60-qa jýyq qyz-jigit patshakóńil kórermenge qaltqysyz qyzmet etýge árkez ázir. Al qoıylymnyń sátti shyǵýyn belgili rejıser Nurqanat Jaqypbaı udaıy óz nazarynda ustaıdy. Ónerge ǵashyq jastardy qanatynyń astyna alyp, bar tálimin aıamaǵan tulǵa teatrdyń aldyńǵy qatardan kórinýine kóp eńbek sińirdi. Ujymnyń 16 jyldyń ishinde halyqaralyq 16 baıqaýdyń bas júldesin jeńip alýy - osy sózimige dálel. Alǵash «Shyńǵysqan» spektaklimen shymyldyǵy túrilgen mádenıet ordasynda 60-qa jýyq qoıylym qoıyldy. Áli de qalyń jurtshylyqqa tartýy az emes.
- Biz «Jibek» spektaklimen Koreıaǵa bardyq. Bizdiń akterlar ózderi bıleıdi,ózderi án aıtady, ózderi oınaıdy, besapap. Bular robot pa dep tań qalǵan. Bizde jandy daýysta bári. Jylyna 3 spektákl premera beremiz. Buıyrsa, Qyrǵyzstannyń halyq jazýshysy Q. Imanálıev bizge «Shoqan» shyǵarmasyn jazyp jatyr. Osy jaqynda aıaqtalýy kerek. Sol «Shoqan» spektaklin shyǵaramyz, - dedi «Jastar» teatry dırektorynyń mindetin atqarýshy Azamat Esqulov.
Teatrdyń óner ólkesin moıyndatýyna respýblıkanyń túkpir-túkpirin aralap, gastróldik sapar jasaýy úlken serpin beredi. Sondyqtan sáýir aıynda ártister Ózbekstan eline attanady. Alatopyly aǵaıyn ujymnyń eń úzdik degen 4 qoıylymyn tamashalaýǵa múmkindik alady. Al jazǵa salym shyǵarmashylyq top Túrkıadaǵy óner festıvalinde baq synaıdy.
Elimizde qansha teatr bar?
"Teatr kóbeıse, túrme azaıar edi". Sherhan Murtazanyń osy sózinen-aq bul ónerdiń mańyzyn ańǵarýǵa bolady. Keıingi jyldary bizdiń elde mádenı oryndardyń qatary artyp keledi. Mınıstrliktiń esebinshe, teatrlar sany 67-ge jetken. Onyń 57-si memleket qaraýynda. 11-i respýblıkalyq mártebege ıe bolsa, qalǵany óńirlerde ashylǵan. Byltyr 2 myńnan asa spektákl qoıyldy desek, sonyń 66-sy tyń týyndy. Al teatrǵa barǵandar sany 1 mln adamǵa jýyqtaǵan. Byltyr teatr ujymdary 27 halyqaralyq jarysqa qatysyp, oljaly oraldy. Teatr 67, onyń 57-i memlekettik, 11-i respýblıkalyq, 46-sy óńirlik bolyp esepteledi. 2023 jyly 2 167 spektákl qoıylǵan. 66-y premera kórermenge jol tartqan. Jalpy 1 mln adam teatr qoıylymyn tamashalaǵan.