Oqý-aǵartý mınıstrligi saltanatty is-sharany qymbat sharlarmen bezendirýge tyıym saldy
Bıyl elimiz boıynsha 400 myńǵa jýyq oqýshy mektep tabaldyryǵyn attaǵaly tur, dep habarlaıdy Almaty-akshamy.kz Almaty.tv-ge silteme jasap.
Barlyq bilim ordalary búgin jańa oqý jylyna sońǵy daıyndyqtaryn júrgizdi. Alǵashqy qońyraý saltanatty jıyny da jańa tártippen ótkizilmek. Oqý-aǵartý mınıstrligi saltanatty is-sharany qymbat sharlarmen bezendirýge jáne jeke stýdıalardan anımatorlar jaldaýǵa tyıym saldy.
Ala jazdaı dop qýyp, úsh aı asyr salyp oınaǵan balalar erteńnen bastap mektepke oralady. Elimizdegi barlyq bilim mekemelerinde búgin tańnan beri qarbalas. Qabyrǵaǵa banner ilip, mektep aýlasyna qońyraýdyń sýretin bormen syzyp, tynym tappaı jatyr. Bastysy muǵalimder bıylǵy saltanatty jıynnyń eshqandaı sanıtarlyq shekteýsiz ótetetine qýanyshty.
«1-synypqa baratyn balalar úshin – meıram. Sondyqtan is-sharaǵa daıyndyqty tolyq júrgizdik. Ata-analarǵa da syrttan keletin qonaqtarǵa da eshqandaı shekteý qoıyp jatqan joqpyz. Erkin formatta ótkizemiz. Byltyrǵymen salystyrǵanda 120 oqýshydaı artyq. Bala sany bıyl kóbeıdi. Bul salystyrmaly túrde jaqsy kórsetkish», – dedi №81 mektep-gımnazıa dırektory Nurǵalı Turymbetov.
Jyl saıyn oqýshylar men ata-analardy jańa reformalarmen qýantyp júrgen Oqý-aǵartý mınıstrliginiń bıyl da jańalyǵy az emes. Oqý aptasy uzardy. Iaǵnı oqýshylar ádettegideı 25 mamyrǵa deıin emes, 31-ine deıin oqıtyn bolady. Esesine aptasyna 5 kún oqyp, 2 kún demalady. Bul oqý júktemesin azaıtýǵa múmkindik beredi.
«Senbi kúni balalarǵa qıyn taqyryptardy meńgerýge nemese qaıtalaý, shyńdaý sekildi túrli jumysqa ýaqyt bólýge múmkindik berip otyrmyz», – dedi Y. Altynsarın atyndaǵy Ulttyq bilim akademıasynyń vıse-prezıdenti Álıa Chokýsheva.
Bıyl elimizdiń Oqý-aǵartý mınıstri saltanatty is-sharany qymbat sharlarmen bezendirýge jáne jeke stýdıalardan anımatorlar jaldaýǵa tyıym salǵan bolatyn. Al muǵalimderge gúl syılaýǵa ruqsat berdi. Sodan bolar, qazir bazardaǵy florısterdiń saýdasy qyzyp tur.
«Bir túbi 800 teńge turady. Shamamen 2400-2500 teńgege shyǵady. Klıentterdiń talǵamyna qaraı 5-6-10 myńǵa deıin jasap bere alamyz. Kóp alyp jatsa, baǵasyn túsirip beremiz», – dedi satýshy Ásel Ábdirahmanova.
Bıyl elimizde 3 mıllıonnan astam bala mektepke barady. Onyń 400 myńǵa jýyǵy 1-synyp oqýshylary. Erteńnen bastap 7,5 myńnan astam bilim ordasy balalar úshin esigin aıqara ashpaq.