Jyl saıyn 8 shildede Dúnıejúzilik alergıamen kúres kúni atap ótiledi. Bul kún 2005 jyly Dúnıejúzilik alergıa uıymy men Dúnıejúzilik ımmýnopatologıa uıymynyń sheshimimen belgilengen.
Ataýly kúnniń maqsaty — jurtshylyqty aýrýdyń belgileri týraly habardar etý, turaqty tekserýlerden ótýge nasıhattaý, dep habarlaıdy Almaty-akshamy.kz
«Alergıa» termınin 1906 jyly balalar dárigeri Klemens fon Pırke engizgen. Sımptomdar ejelden beri belgili. Alergıa týraly alǵash ret Ejelgi Egıpette aıtylǵan, biraq ony aýqymdy zertteý tek HİH ǵasyrda bastaldy.
Alergıa – bul organızmniń qorshaǵan ortanyń keıbir faktorlary — alergenderdiń áserine joǵary sezimtaldyq jaǵdaıy, osy zattardyń qaıta áserinen órshıdi. Bul aýrýdyń damýyna yqpal etetin faktorlardyń ishinde eń kóp taraǵandary: qorshaǵan ortanyń lastanýy, psıhologıalyq shamadan tys júkteme, klımattyń ózgerýi, sapasyz tamaq ónimderi, dári-dármekterdi baqylaýsyz qoldaný.
Kardıologıa jáne ishki aýrýlar ǴZI Respýblıkalyq alergologıa ortalyǵynyń basshysy Araı Batyrbaevanyń aıtýynsha, kez kelgen alergıanyń negizgi sebepteri adamnyń genetıkasyna negizdelgen. Kóbinese alergıa erte jasta taǵamǵa joǵary sezimtaldyqpen paıda bola bastaıdy.
«Alergıalyq aýrýlardyń aldyn alý úshin alergıa týdyratyn zattardy anyqtaý jáne este saqtaý qajet. Olarmen baılanysta bolýdan aýlaq bolyńyz, qajet bolǵan jaǵdaıda ózińizge qalaı kómektesýge bolatyndyǵyn bilińiz. Eger ósimdik tozańyna alergıańyz bolsa, aýa temperatýrasy joǵary bolǵan kezde kúnge shyqpańyz, maskany qoldanyńyz. Eger jándikter shaǵyp, ornynda jándiktiń ýy qalsa, ony alyp tastańyz jáne tistegen jerge sýyq kompres qoıyńyz. Úıdegi dári qobdıshasynda dáriger taǵaıyndaǵan dári-dármekter bolýy kerek. Ózdiginen emdeýmen aınalyspaı, medısınalyq mekemege júginińiz», - deıdi dáriger.
Aıta ketý kerek, KİAǴZI Respýblıkalyq alergologıa ortalyǵynda alergolog dárigerlerdiń bilikti keńesteri, alergıalyq aýrýlardy dıagnostıkalaý jáne emdeý júrgiziledi. Qabyldaý kún saıyn MÁMS sheńberinde jáne aqyly negizde saǵat 8:00-den 17:00-ge deıin Áıteke bı kóshesi, 120/1 jáne Pátnıskıı kóshesi, 52 mekenjaıy boıynsha júrgiziledi. 233-00-90 jáne 309-08-99 telefondary arqyly jazylýǵa bolady.