Testileý 10 aqpanǵa deıin ótkiziledi.
Oǵan qatysýǵa 125 myńǵa jýyq ótinish tústi, dep habarlaıdy Almaty-akshamy.kz.
Ótinishterdi qabyldaý Ǵylym jáne joǵary bilim mınıstrligi Ulttyq testileý ortalyǵynyń app.testcenter.kz saıtynda 20 jeltoqsannan 6 qańtarǵa deıin júrgizildi.
Qańtardaǵy UBT-ǵa joǵary oqý oryndaryna shartty túrde qabyldanǵan stýdentter, shyǵarmashylyq daıyndyqty talap etetin BBBT (bilim berý baǵdarlamalar toby)-dan basqa bilim berý baǵdarlamalary tobyna aýysýǵa nıet bildirgen JOO bilim alýshylary, aqyly negizde «Pedagogıkalyq ǵylymdar» bilim berý salasyna aýysýǵa nıet bildirýshiler, sondaı-aq qalaýy boıynsha JOO aqyly negizde oqýǵa qabyldanǵysy keletin mektep túlekteri qatysady.
Tirkelý kezinde test tapsyrýshylar emtıhan ornyn, kúnin jáne ýaqytyn ózderi tańdaıdy. Aıta ketý kerek, 2023 jylǵy UBT-da testileý formaty ózgerissiz qaldy. Qazaqstan tarıhy boıynsha testileýge qatysýshylar 20 tapsyrmany, oqý saýattylyǵy – 15, matematıkalyq saýattylyq – 15 jáne eki beıindik pán boıynsha 35 tapsyrmany oryndaıdy. Barlyǵy – 120 suraq. Eń joǵary bal – 140. Testileýdiń jalpy ýaqyty – 4 saǵat (240 mınýt). Sondaı-aq, erekshe bilim berý qajettilikteri bar balalar úshin qosymsha 40 mınýttyq ýaqyt saqtalady.
Sonymen qatar dıstraktorlar sany azaıdy (jaýap nusqalary). Bir durys jaýaby bar test tapsyrmalarynda nusqalar sany besten tórtke deıin, bir nemese birneshe durys jaýaptary bar test tapsyrmalarynda (úsh durys jaýaptan kóp emes) segizden altyǵa deıin azaıtyldy.
Qańtardaǵy UBT-dan bastap «Informatıka muǵalimderin daıarlaý», «Aqparattyq tehnologıalar», «Aqparattyq qaýipsizdik» bilim berý baǵdarlamalarynyń toptaryna túsýge nıet bildirýshiler UBT-ny «Matematıka-Informatıka» kombınasıasy boıynsha tapsyrady.
«Búgin 2023 jylǵy alǵashqy UBT bastaldy. Biz testileý kezinde ǵana emes, oǵan daıyndyq barysynda da jaǵdaı jasaýdy jalǵastyramyz. Mysaly, 11 bilim berý ortalyǵy talapkerlerge tegin onlaın sabaqtar ótkizedi. Oqý jylynyń basynda UTO saıtynda «Qazaqstan tarıhy» jáne «Dúnıejúzi tarıhy» boıynsha 100 data, «Qazaq ádebıeti» jáne «Orys ádebıeti» boıynsha ádebıetter tizimi, «Informatıkadan» termınder tizimi ornalastyryldy. Sondaı-aq UBT suraqtary men test jospary qurastyrylǵan oqýlyqtardyń tizimi jarıalandy. Iaǵnı talapkerlerde testileýdi sátti tapsyrý úshin barlyq múmkindik bar», – dep atap ótti QR ǴBJM Ulttyq testileý ortalyǵynyń dırektory Rýslan Emelbaev.
Testileý kezinde kálkýlátor, Mendeleev jáne tuzdar erigishtigi kesteleri barlyq talapker úshin kompúter ekrandarynda qoljetimdi bolady. Sondaı-aq UBT qatysýshylaryna ózderimen qalam, sý jáne shokolad alyp kelýge ruqsat etiledi.