Brazılıanyń ońtústiginde toqtaýsyz jańbyr jaýyp, munyń sońy tasqynǵa ulasty.
Saldarynan bóget isten shyǵyp, 39 adam opat boldy, dep habarlaıdy almaty-akshamy.kz. Taǵy 70 kisi iz-túzsiz ketken. Bul týraly jergilikti zamattyq qorǵanys agenttigi habarlady. Olardyń sózinshe, bógettiń buzylýynan tolqyn deńgeıi 2 metrge deıin jetken. Bul sý basqan aımaqtarǵa qatty zaqym keltirip, 15 myńǵa jýyq turǵyn qonysyn tastaýǵa májbúr bolǵan. Rıo-Grande-dý-Sýl shtatynda shamamen 500 myń adam jaryqsyz jáne aýyz sýsyz otyr. Bul Brazılıadaǵy sońǵy 80 jyldaǵy eń alapat tasqyn deıdi mamandar.
Edýardo Leıte, Rıý-Grandı-dý-Sýl shtatynyń gýbernatory: - Bul aımaq tarıhynda buryn-sońdy tirkelmegen eń aýyr apat. Halyq alapat tasqynǵa alǵash ret kýá bolyp otyr.
Turǵyndardy qaýipsiz jerge kóshirip jatyr
Tehastyń ońtústik-shyǵysynda da qolaısyz aýa raıy tirkeldi. Qatty jaýyn-shashyn saldarynan Húston qalasynda mektepter ýaqytsha jumysyn toqtatty. Qozǵalys shektelip, joldar jabyldy. Al San-Hasınto ózeniniń deńgeıi 20 metrge jetken. Ózen sýy taǵy 3 metrge kóterilýi múmkin. Ulttyq metereologıa qyzmeti tasqyn qaýpi baryn eskertti. Bılik turǵyndardy shuǵyl qaýipsiz jerge kóshirip jatyr.
Ostın Djýno, Húston qalasynyń turǵyny: - Ózen sýy kóz aldymyzda tez kóterilip jatyr. Sońǵy birneshe saǵatta joldardy sý basyp úlgerdi. Qazir Konro kóline bógetterdi ashyp, úlken kólemde sý jiberip jatyr. Sol sebepti tez kóterilýde.
Tasjol opyrylyp, 48 adam opat boldy
Toqtaýsyz jaýǵan jańbyrdan keıin Qytaıdyń ońtústiginde tas joldyń bir bóligi opyrylyp tústi. Oqıǵa Gýandýn provınsıasynyń Meıda avtojolynda bolǵan. Tas-talqany shyqqan tas joldyń uzyndyǵy shamamen 18 metrge jetedi. 23 kólik úıindi astynda qalǵan. 48 adam mert boldy, taǵy 30 kisi jaraqat aldy. Aıta keteıin, óńirde sońǵy eki aptada rekordtyq deńgeıde jaýyn-shashyn túsip, tasqyn júrgen.