QR İİM Ákimshilik polısıa komıteti tabıǵatty qorǵaý polısıasynyń aǵa ınspektory Álisher Jarmaǵambetov qorshaǵan ortany qorǵaý zańdylyqtaryn buzýshylarmen kúres máselesi týraly aıtty, dep habarlaıdy Almaty-akshamy.kz.
«Jyl basynan beri polısıa qyzmetkerleri 300 myńnan astam ákimshilik quqyq buzýshylyqtar anyqtaldy, ekologıalyq quqyq buzýshylyqtar boıynsha 304 sotqa deıingi tergeý bastaldy. Memleketke keltirilgen shyǵyn 13 mıllıard teńgeden asady. Jalpy brakonerliktiń sebebi – adamdardyń ózderiniń zańsyz áreketteriniń ekojúıege ákeletin saldarlarynyń aýyrlyǵyn tolyq túsinbeýinde. Zańsyz, ıaǵnı orman, janýarlar, balyq nemese jer qoınaýy bolsyn tabıǵı resýrstardy baqylaýsyz paıdalaný aýdannyń búkil ekojúıesine keri áserin tıgizedi», - dedi Jarmaǵambetov.
Ol ataǵandaı, osy sebepti memlekettik organdar birqatar uıymdastyrýshylyq jáne zańnamalyq sharalardy qolǵa alýda.
«Joǵary táýekel maýsymdarynda reıdtik is-sharalardy ótkizýge erekshe nazar aýdarylady. Mysaly, balyq pen sútqorektilerdiń ýyldyryq shashatyn kóktemgi kezeńinde, alǵashqy qardyń kúzgi kezeńinde jáne janýarlardyń erekshe osaldyǵy kezeńinde qorǵaý jumystary kúsheıtiledi. Osyǵan baılanysty osy jyldyń 20 qazanynan 19 qarashasyna deıin ishki ister mınıstrligi "Brakoner" jedel profılaktıkalyq is-sharasyn ótkizedi, onyń maqsaty janýarlar dúnıesi, balyq jáne orman sharýashylyǵy obektilerin, jer qoınaýyn zańsyz óndirý faktileriniń aldyn alý jáne anyqtaý bolyp tabylady. İs-shara bastalǵannan beri 61 qylmystyq jáne 2 myńnan astam ákimshilik quqyq buzýshylyq anyqtaldy. Sonymen qatar ańshylar arasynda qarý-jaraqqa salǵyrt qaraý jáne ań aýlaý erejelerin buzý ań aýlaý kezinde jaraqat alýǵa ákelip soqtyratyn jaǵdaılar oryn alyp turady»,- dedi ol.