Osy jobany qarjylandyrý boıynsha tıisti jumystar bastaldy.
Indýstrıa jáne ınfraqurylymdyq damý mınıstri Qaıyrbek Óskenbaev CITIC Construction Co Ltd. jáne China Huanqiu Contracting & Engineering (Shanghai) Co., Ltd. kompanıalarynyń ókilderimen kezdesti, dep habarlaıdy Almaty-akshamy.kz Baq.kz cilteme jasap.
Kezdesý barysynda Zhaik Petroleum LTD qazaqstandyq kompanıasy men qytaılyq kompanıa arasynda EPC-kelisimshartqa (bul jobalaý, satyp alý jáne qurylysty qamtıtyn kelisimshart) qol qoıyldy. Osy kelisimshart arqyly Batys Qazaqstan oblysynda ónimdiligi 130 myń tonna metanol óndirýge qaýqarly gaz-hımıa keshenin salý kózdelip otyr.
Elimizdiń tarapy bul jobany tabysty iske asyrý maqsatynda qajetti qoldaýdy kórsetýge daıyn. Qazir «Báıterek» Ulttyq basqarýshy holdıńi» AQ-nyń damý ınstıtýttarymen birlesip, osy jobany qarjylandyrý boıynsha tıisti jumystar bastaldy. Óz tarapymyzdan jobalaý men qurylysty júzege asyrý, sondaı-aq jobany sátti iske asyrý úshin qajetti jabdyqtardy jetkizý jónindegi josparlaryńyzdy quptaıtynymyzdy aıtqymyz keledi, - dedi Qaıyrbek Óskenbaev.
Osy rette qurylys-montaj jumystary kezeńinde 500-ge jýyq jumys orny, sondaı-aq keshen iske qosylǵannan keıin 220 turaqty jumys orny ashylady dep josparlanyp otyr. Jobanyń jalpy quny – 140 mln dollar.
Atalǵan gaz-hımıa kesheni 2024 jyldyń aıaǵyna qaraı iske qosylmaq. Budan keıin quny 200 mln dollarǵa amıak pen karbamıdti shyǵarýǵa baılanysty jobanyń ekinshi kezeńi iske asyrylady dep qarastyrylǵan.