Balyq sharýashylyǵy salasynyń damý núktesi - balyq ósirý.
Bıyl Qazaqstanda 42 myń tonnadan astam balyq aýlandy. Bul týraly Úkimet otyrysynda QR Ekologıa, geologıa jáne tabıǵı resýrstar mınıstri Serikqalı Brekeshev aıtty, dep habarlaıdy Almaty-akshamy.kz QazAqparatqa silteme jasap.
«Balyq ósirý - ekonomıka ósimi men jumyspen qamtýda mańyzdy salalardyń biri. Balyq sharýashylyǵynda negizgi eki baǵyttaǵy qyzmet bar – balyq aýlaý jáne balyq ósirý. Bıyl 10 aıdaǵy balyq sharýashylyǵynyń qurylymy mynadaı: aýlanǵany – 42,6 myń tonna, ósirilgeni – 14,1 myń tonna, eksport – 16 myń tonna, ımport – 32 myń tonna. Balyq sharýashylyǵy salasynyń damý núktesi - balyq ósirý. Byltyr sáýirde Úkimet Balyq salasyn damytý baǵdarlamasyn qabyldady», - dedi ol.
Mınıstrdiń aıtýynsha, atalǵan baǵdarlamany iske asyrý nátıjesinde 2030 jylǵa deıin balyq ósirýdi 270 myń tonnaǵa, balyq ónimderin ishki tutynýdy 134 myń tonnaǵa ulǵaıtý, ımport kólemin 45 myń tonnadan 25 myń tonnaǵa deıin azaıtý josparlanyp otyr.
«Kórsetilgen ındıkatorlarǵa qol jetkizý úshin bıznesqa qolaıly jaǵdaı jasalyp otyr. Birinshi, óndiristik jáne ınvestısıalyq shyǵyndardy sýbsıdıalaý arqyly memlekettik qoldaý sharalary keńeıtildi. Ekinshi, sý aıdyndaryn balyq aýlaý sharýashylyǵynan balyq ósirýge aýystyrý jeńildetildi. Úshinshi, balyq ósirý sharýashylyǵy úshin sý qorǵaý beldeýinde jer berýdiń shekteýleri alynyp tastaldy. Tórtinshi, jobalaý-smetalyq qujat, memlekettik saraptama sıaqty kedergiler alynyp tastalyp, tek eskızdik joba negizinde balyq ósirý toǵandaryn salýǵa múmkindik berildi», - dedi Serikqalı Brekeshev.