Almaty qalasynyń Bostandyq aýdanynda jyl saıynǵy aýdandyq «RYH MARATHON» spartakıadasynyń saltanatty ashylýy sátti ótti.
İs-sharany Almaty qalasynyń Jastar saıasaty basqarmasy men Bostandyq aýdanynyń ákimdigi qoldap, jastar men sport súıer qaýymdy belsendi ómir saltyna yntalandyrdy, dep habarlaıdy aqshamnews.kz.
Spartakıadanyń ashylýy aýdandaǵy bos ýaqyt ótkizý ortalyqtarynyń tárbıelenýshileri arasynda ótken qyzyqty fýtbol machymen este qaldy. Týrnırge qatysýshylar oıyn tehnıkasyn ǵana emes, shynaıy komandalyq rýhty da kórsetti. Týrnır basynda jarıalanǵan júlde qory komandalarǵa qosymsha yntalandyrý berip, jeńiske degen umtylysty kúsheıtti.
Fýtbol týrnırine «ZHASTAR», «CRUSH», «ZHANUKAY», «SHALQAR», «DMU» atty bes komanda qatysty. Bul komandalar aýdan jastarynyń sporttyq bastamalarynyń kórinisi bolyp, árqaısysy dostyq básekelestik atmosferasyn qalyptastyrýǵa óz úlesin qosty.
«RYH MARATHON» spartakıadasy aldaǵy aptalarda qatysýshylar men kórermenderdi túrli sporttyq saıystarmen qýantady. Jeńil atletıka, voleıbol, basketbol jáne basqa da sport túrleri boıynsha básekeler ótkiziledi. Qatysýshylar fızıkalyq daǵdylaryn jetildirip qana qoımaı, dostyq pen yntymaqtastyq rýhyn nyǵaıtýǵa múmkindik alady.
Aıta ketý kerek, Almatydaǵy bos ýaqyt ótkizý ortalyqtary jastardyń damýyna úlken úles qosady, túrli úıirmeler men belsendi bos ýaqytty ótkizetin baǵdarlamalar usynady. Búgingi tańda qalada 100 bos ýaqyt ótkizý ortalyǵy jumys isteıdi, olardyń bazasynda 260-tan astam tegin úıirme uıymdastyrylǵan. Bul ortalyqtarda 14 pen 29 jas aralyǵyndaǵy 12 myńnan astam jas tirkelgen, olardyń sany jyl saıyn artyp keledi.
«RYH MARATHON» spartakıadasy tek sporttyq jarys emes, sondaı-aq jastar arasynda kóshbasshylyq qasıetterdi damytý men sport mádenıetin nyǵaıtýǵa arnalǵan platforma bolyp tabylady. İs-shara salaýatty ómir saltyn nasıhattap, qoǵamdaǵy belsendi azamattyq ustanymdy qalyptastyrýǵa yqpal etedi.