Jer kodeksine engizilgen ózgeris boıynsha jergilikti atqarýshy organdarǵa jańa mindet júkteldi, dep habarlaıdy Almaty-akshamy.kz. QazAqparatqa silteme jasap.
Joǵary aýdıtorlyq palata baspasóz qyzmetiniń málimetinshe, 2021 jylǵy maýsymda jer resýrstarynyń utymdy basqarylýyn, paıdalanylýyn jáne qorǵalýyn qamtamasyz etý, sondaı-aq geodezıa jáne kartografıa salasyndaǵy jer resýrstarynyń basqarylý tıimdiligine memlekettik aýdıt júrgizilgen.
Onyń barysynda Jer kodeksinde jergilikti atqarýshy organdarǵa bos jatqan jer telimderi týraly aqparatty jarıalaý talaptarynyń joqtyǵy anyqtalǵan.
Osyǵan baılanysty QR Úkimetine Jer kodeksindegi olqylyqtardy joıý máselesin qaraý týraly usynym berildi.
Osylaısha Jer kodeksiniń 43-babynyń 1-1-tarmaǵyna ózgerister engizildi.
Oǵan sáıkes jergilikti atqarýshy organdar bos jer ýchaskeleri men josparlanyp otyrǵan saýda-sattyq jónindegi aqparatty memlekettik múlik tiziliminiń veb-portalynda, ózderiniń ınternet-resýrsynda jáne halyqqa qoljetimdi jerlerdegi arnaýly aqparattyq stendte derekterdi toqsan saıyn jańartyp otyrý kezeńdiligimen jarıalaýǵa mindetti.