Grýzıanyń Borjomı qalasy bizdiń eldegi tabıǵı apattan zardap shekken otbasylardyń balalaryna tosyn syı ázirledi.
Jergilikti kýrorttar qazaqstandyq oqýshylardy ońaltý kýrsynan ótip, umytylmas demalys ótkizýge shaqyryp otyr. Ásem taýlar, ný orman men tabıǵı mıneraldy sýlar. Elimizde tasqynnan zardap shekken balalardy gúrji eliniń tumsa tabıǵaty kútip tur. Tanymal kýrorttar qazaqstandyq balalardy qonaqqa shaqyrýda, dep habarlaıdy Almaty-akshamy.kz 24.kz-ke silteme jasap.
«Qazaqstanda osyndaı qaıǵyly jaǵdaı bolyp jatqany óte ókinishti. Biz ony aýyr qabyldadyq. Byltyr ǵasyrlar boıy jalǵasyp kele jatqan dostyǵymyzdy odan ári nyǵaıtatyn qujatty bekitken edik. Soǵan saı qol ushymyzdy sozýǵa daıynbyz. Atap aıtqanda, balalardy ońaltý baǵdarlamasynan ótkizýdi usynyp otyrmyz. Josparymyz - tabıǵı apattan zardap shekken balalardy osynda ákelip, kóńilderin aýlap, qalamyzdy kórsetý», - deıdi Borjomı qalasynyń meri Otar Arbolıshvılı.
Borjomı bıligi shaharǵa qazaqstandyq 20 balany shaqyryp otyr. 10 kúnge sozylatyn demalysqa balalar men olardy alyp júrýshiler ushaq arqyly aldymen Kýtaısı qalasyna attanady. Keıin avtobýspen shıpajaıǵa bet alady.