Astanada sot Ábilhan Boranbaev (Qaırat Boranbaevtyń nemere inisi) pen Dáýren Qazbekke sybaılas jemqorlyq qylmysy úshin úkim shyǵardy. Bul týraly 2023 jyldyń 26 qazanynda elordanyń qylmystyq ister jónindegi aýdanaralyq sotynda málim boldy.
Qylmystyq isti Astana qalasynyń qylmystyq ister jónindegi aýdanaralyq sotynyń sýdıasy Baǵlan Ydyrysov qarady.
Sotta Boranbaev aǵa jedel ýákili Dáýren Qazbek pen Sh.-ǵa (tergeý kezinde qaıtys bolýyna baılanysty is toqtatyldy) jalpy somasy 1,6 mln teńgeden astam para bergeni anyqtaldy.
Qazbek jáne Sh. adamdar tobynda aldyn ala sóz baılasý arqyly para alyp, qamaýǵa alynǵan Boranbaevqa mobıldi baılanys, kezdesýler, týǵan kúnin alkogóldi ishimdikterdi qoldaný arqyly toılaý úshin basqa adamdarmen baılanysqa túsýine zańsyz múmkindik bergen.
Prokýror Boranbaevty 4 jyl 6 aı merzimge, al sottalýshyǵa Qazbekti 7 jyl merzimge bas bostandyǵynan aıyrý jazasyn taǵaıyndaýdy surady. Qorǵaýshy tarap eki sottalýshyǵa aıyppul túrinde jaza taǵaıyndaýdy surady.
Sot Ábilhan Boranbaevtyń 4 jas balasynyń bolýyn, kinásin moıyndaýyn, ókinýin, qylmystyq quqyq buzýshylyqty ashýǵa jáne qylmystyq quqyq buzýshylyqtyń basqa da qatysýshylaryn áshkereleýge belsendi yqpal etkenin, al Dáýren Qazbektiń 3 jas balasynyń bolýyn, kinásin moıyndaýyn jáne ókinýin qylmystyq jaýaptylyq pen jazany jeńildetetin mán-jaılar retinde tanydy, - delingen Astana soty taratqan aqparatta.
Sot úkimimen Ábilhan Boranbaev memlekettik qyzmette jáne kvazımemlekettik sektorda laýazymdardy atqarý quqyǵynan ómir boıyna aıyrylyp, 4 jyl 6 aıǵa bas bostandyǵynan aıyryldy.
Dáýren Qazbek memlekettik qyzmette jáne kvazımemlekettik sektorda qyzmet atqarý quqyǵynan ómir boıyna aıyrylyp, 7 jylǵa sottaldy.
Úkim zańdy kúshine engen joq.