Qazaqstanǵa bólshektep ákelinip, qurastyrylǵan kólikterdi zańdastyrýǵa ruqsat berilýi múmkin.
Bul týraly Ákimshilik polısıa komıteti «Ashyq» NQA portalynda jarıalaǵan Úkimet qaýlysynda kórsetilgen, dep habarlaıdy Almaty-akshamy.kz QazAqparatqa silteme jasap.
Qujatta kórsetilgendeı, kóliktiń kedendik tazartýdan ótkeni týraly málimeti joq jáne izdeýde bolmasa, onyń bastapqy memlekettik tirkelgeni úshin 200 000 teńge mólsherinde alym mólsherlemesimen memlekettik tirkeýge jol beriledi.
Ol úshin azamattardan myna qujattar suralady:
- ótinish berýshiniń kólik quralyn satyp alý mán-jaılary kórsetiletin ótinishi;
- ishki ister organdarynyń ýákiletti qyzmetkeri bergen kólik quralyn qarap tekserý aktisi;
- tehnıkalyq baıqaýdyń dıagnostıkalyq kartasy.
Qaýly jobasyna qosymsha berilgen túsindirmede mundaı ózgeris Qazaqstan aýmaǵyna bólshektep ákelinip, elde qurastyrylǵan kólikterdi zańdastyrýǵa arnalǵany aıtylǵan.
«Bul qosalqy bólshekterdiń túrleri boıynsha ákelingen jáne Qazaqstan azamattaryna ótkizilgen avtomobılderdi zańdastyrý úshin qarastyrylyp otyr. Kólik quraldary QR aýmaǵynda ǵana paıdalanýǵa jatady. Mundaı kólik quraldaryna qatysty menshik quqyǵyn ózgertýge jol berilmeıdi. Mundaı kólik quralyn tirkeý týraly kýálikte menshik quqyǵyn ózgertýge tyıym salý tek QR aýmaǵynda paıdalanýǵa ruqsat etiledi», - delingen qaýlyda.
Qujat 24 naýryzǵa deıin kópshilik talqylaýda bolady.
Eske salaıyq, buǵan deıin BAQ ókilderiniń saýalyna jaýap bergen Ákimshilik polısıa komıteti tóraǵasynyń mindetin atqarýshy Qaısar Sultanbaev «konstrýktor» kólikterdiń zańdastyrylmaıtynyn aıtqan edi.