№ 202 mektep-gımnazıa ujymy men oqýshylary, sondaı-aq olardyń ata-analary Ǵ.Músirepov atyndaǵy Qazaq memlekettik akademıalyq balalalar men jasóspirimder teatrynda memlekettik «Daryn» syılyǵynyń ıegeri, aqyn, jazýshy Aqberen Elgezektiń «Bolmaǵan balalyq shaq» týyndysynyń sahnalandyrylǵan qoıylymyn tamashalady.
Bul sharanyń aldynda mektepte dástúrli túrde ótetin «Kitap oqý» baıqaýyna (muǵalimder, oqýshylar, ata-analar arasynda ótetin jarys) atalǵan týyndy tańdap alynǵan bolatyn. Osy sharanyń basy-qasynda júrgen gımnazıa basshysy aldymen shákirtteriniń shyǵarmany oqyp, taldap, túısinýine qajettilikti qaperge alyp, teatrlyq qoıylymdy da kórgen jón dep sheshken edi. Teatr zalyn bilim ujymynyń 500-ge jýyq kórermeni toltyryp tastady.
Qoıylym bastalar aldynda mektep basshysy Bolat Janaıhanuly týyndy avtorymen tanystyryp, shyǵarmanyń búgingi qoǵamdaǵy ózekti máseleni kótergenine toqtaldy. Ata-ana men bala arasyndaǵy qarym-qatynas, balalyq shaqtyń baqyty jaıynda sóz qozǵap, jas kórermenderdiń rýhanı azyq alýyna tilegin qosty. Qoıylymǵa avtordyń arnaıy kelip, birge kórýi kórermen qaýymǵa erekshe áser berdi.
Sahnadaǵy Aqoshtyń taǵdyry... Menińshe, jas kórermenniń kóbi ómir jaıly, onyń qundylyǵy týrasynda tolqyp otyrǵandaı kórindi. Al, eresekter birazy ótken kúnderin eske alyp, kóz jasyna erik bergendeı me dersiń. Rasy sol, sahnadaǵy keıipkerlerdiń shynaıylyǵyna basymdyq bergen akterler jas kórermen júregine jol tapty dep bilemin. Sheberlik degen osy. «Sońy nemen biter eken?..» degen saýal sanaly kórermenniń oıyn janarynan oqytqandaı. 
Anasyna degen máńgilik saǵynyshyn aıtqan sahnadaǵy Aqoshtyń úni ár balanyń júregine jetti, bilem. Qoıylym sońynda kórermender oryndarynan turyp, uzaq qoshemet kórsetti. Aqberen Elgezek sahnaǵa shyqqan sátte oqýshylar dúr silkindi. Mynadaı qıyn taǵdyrǵa moıymaı, áke esimine laıyq azamat bolyp aldarynda qasqaıyp turǵan azamatqa qýandy. Avtor: «Mende qazir bári jaqsy. Eshqashan moıymańdar!» degen kezde pák kóńilder aqynǵa razy boldy. Oqýshylardyń avtorǵa degen saýaldaryn aldaǵy kezdesý kezinde qoıyp, naqty jaýap alatynyna da senimdimiz.
«Myna qoıylym kórermen-shákirtke nendeı oı saldy?» degenge kelsek, búgingi qoǵamdaǵy mándi máseleniń beti ashylǵany baıqalady. Jetkinshekter júrekke degen meıirimdi ózi ǵana bere alatynyn bilip, aınalaǵa jylýlyqty ózi tóge alatynyn túısingendeı. Qoıylymǵa barǵan kórermenniń utqan tusy da osy. Mundaı ádebı-mádenı sharany uıymdastyrý arqyly ulttyq ádebıettiń orta býyn ókili men onyń bir týyndysynyń qanshama oqyrman júregine jol tabýyna sebepshi bolǵandaımyz», – deıdi Áýezov aýdanyndaǵy № 202 mektep-gımnazıa dırektorynyń tárbıe isi jónindegi orynbasary Saparkúl Lesova.