Keshegi Tarazda bolǵan jarylys búkil Qazaqstan halqynyń qabyrǵasyn qaıystyryp ketti.
Qazirdiń ózinde 13 adam qaza tapqany jarıa etildi. Qazaqstan Táýelsizdiginiń 30 jyldyǵy qarsańynda mynadaı qaıǵyly oqıǵalardyń oryn alýy janǵa batady. Osy 30 jylda áskerı salada qanshama reformalar oryn aldy. 1993 jyly Qazaqstan Qarýly Kúshteri qurylǵannan bastap, 2000 jyly, 2007 men 2017 jyldary jańa áskerı doktrınalar qabyldandy. Munyń barlyǵy Qazaqstan Qarýly Kúshterin damytýǵa arnalǵan qujattar. Biraq Qarýly kúshterdiń qýaty boıynsha Qazaqstan álemdik reıtıńte 140 memlekettiń ishinde 62 oryndy ıelenip otyr. Bul áskerı salada áli de túrli problemalar bar ekendigin kórsetedi.
Kezinde Arystaǵy jarylystyń aıqaıy qanshama jylǵa sozyldy. Endi kelip Tarazda osy jaǵdaı qaıtalanyp otyr. Nebir atpal azamattardan aırylyp qaldyq. Meniń oıymsha, munyń barlyǵy kadrlyq máselelerdiń kemshiligi men jemqorlyqtyń kesirinen bolyp otyr. Keńes úkimetiniń tusynda bir qoıma jarylypty degendi estimep edik. Ózimiz de aýǵan soǵysyna qatystyq. Ol kezde qyshlaqtarda, taý-tastarda qarý-jaraqtar úıilip jatatyn. Sonyń bireýi de jarylǵanyn kórgen joqpyz. Óıtkeni, ol kezde temirdeı tártip boldy. Negizi, ár salanyń óziniń kásibı mamany óz jumystaryna jaýap berýi tıis. Bul rette, ásirese, áskerde kásibı biliktilikti kúsheıtýimiz qajet. Injenerlik rotalardyń, brıgadalardyń, batalóndardyń sapasyn arttyrýymyz kerek. Endi sapaǵa kóshetin kez jetti.
Prezıdentimiz osy máselege baılanysty aza tutý kúnin jarıalady. Beıbit zamanda, oılamaǵan jerden qaza tapqan baýyrlarymyz ımandy bolsyn! Týma-týystaryna, otbasylaryna, balalaryna shyn júrekten qaıǵyryp kóńil aıtamyn. Bul ózekti órteıtin jaǵdaı. Qudaı bizdi beıbit ómirden aıyrmasyn. Qarýly kúshterimizde mundaı másele qaıtalanbasyn dep tileımin!