Búgin, 29 tamyz, QR Prezıdenti Qasym-Jomart Toqaevtyń Jarlyǵymen Jalpyulttyq aza tutý kúni dep jarıalandy. Qaraly kún adam shyǵyny oryn alǵan Jambyl oblysy Baızaq aýdanyndaǵy áskerı qoımadaǵy jarylysqa baılanysty jarıalandy.
Biz, «jeltoqsandyqtar», Memleket basshysynyń bul sheshimin durys dep qabyldaımyz. «Jeltoqsandyqtar» - qaraly kúnderdiń qandaı bolatynyn osydan 35 jyl buryn óz basynan ótkizgen býyn. Tek ol kúnderi totolıtarlyq júıede eshkim bizdi qaharmandar qataryna qosqan joq edi.
Árıne, Táýelsizdiktiń 30 jyldyǵy qarsańynda, beıbit zamanda osyndaı tótenshe jaǵdaı oryn alǵany ókinishti. Ásirese, táýelsizdikti qorǵaıtyn, qamal buzatyn jastardyń, mamandardyń sheıit bolǵany ókinishti. Konstıtýsıada jazylǵandaı, Qazaqstan Respýblıkasynyń árbir azamaty - bizdiń baǵa jetpes qundylyǵymyz. Táýelsizdiktiń tuǵyrly bolýy úshin árbir azamatymyzdy kózdiń qarashyǵyndaı saqtaýymyz kerek. «Ár qazaq - meniń jalǵyzym» degendeı, atpaldaı azamattardan aıyrylǵanymyz ózekti órteıdi. Olardyń artynda týystary, otbasy, eli qaldy. Biz olardyń óz mindetterin atqarýdaǵy jankeshti erligin, azamattyqtaryn eshqashan umytpaımyz.
Qazaǵa ushyraǵan ár otbasyna, jalpy, qazaq eline bes júzden astam múshesi bar «Jeltoqsan aqıqaty» respýblıkalyq qoǵamdyq birlestigi atynan qaıǵyryp kóńil aıtamyn. Bundaı qaraly kúnder qaıtyp kelmesin! Táýelsizdik tuǵyrly bolsyn!