«Alataý» yqshamaýdanynda ornalasqan Iadrolyq fızıka ǵylymı-zertteý ınstıtýtynda jalpyhalyqtyq referendým qorytyndysy talqylandy.
Ǵylymı-zertteý ınstıtýtynyń bilikti mamandarymen bas qosqan Almaty qalalyq máslıhatynyń depýtattary, «Baıtaq» partıasy men «Amanat» partıasy Medeý aýdandyq fılıalynyń jetekshi ókilderi jalpyhalyqtyq referendým qorytyndysyna kóńili tolatynyn bildire kele, bir aı boıy ózderimen birge elimizdiń aımaqtaryn aralap, túsindirý jumystaryn júrgizýde belsendilik tanytqan ınstıtýt mamandaryna alǵysyn aıtty.
«Atom energetıkasynyń qaýipsizdigi – álbette, energetıkalyq qaýipsizdik. Sol arqyly elimiz energetıkalyq táýelsizdikke umtylyp otyr. Keshegi ótken referendýmǵa qatysty saýaldar da negizinen osy tóńirekte, ıakı AES-tiń qaýipsizdigi men ony kimderdiń salatyny, bul nysandarda kimderdiń jumys isteıtini jóninde órbigeni ras», – dedi óz sózinde jıynǵa qatysqan Almaty qalalyq máslıhatynyń depýtaty, «Amanat» fraksıasynyń múshesi Jandos Nádirov.
Basqosýda qatysqan mamandar ekologıalyq jáne ekonomıkalyq aspektilerdi saralady. Sondaı-aq, jetekshi mamandar tilshi qaýymǵa elimizdiń energetıkalyq qaýipsizdigin qamtamasyz etýdegi AES salýdyń rólin keńinen túsindirdi. Geosaıasattaǵy óz pozısıamyzdy joǵaltpaý jolynda «órken jaıýymyzdyń kúretamyry» sanalar energetıka salasyn damytýymyz asa qajettigin naqty aıtty. Sońǵy eki jylda el-jurtymyz saıası saýattylyǵyn tanytty. Sonyń nátıjesi referendým qorytyndysynan baıqalady.
«Jalpy, bul saıası naýqan – halyq únine qulaq asatyn úkimettik pozısıanyń jarqyn kórinisi. Demek, halqymyz bolashaqta damýymyzǵa yqpal etetin strategıaǵa daýys berdi dep oılaımyn. Alys-jaqyn shetelden kelgen sarapshylardyń da bul saıası naýqanǵa bıik baǵa berýiniń bir mánisi osynda. Bul belsendilik elimizdiń demokratıalyq jaǵynan da ósýin de kórsetedi. Qoǵamdyq damýdyń, sonyń ishinde sıfrlyq damýdyń mańyzdy bóligi – energetıka desek, bul atomdyq reaktorlar tolyqtaı sandyq formatta, avtomattandyrylǵan júıemen jumys isteıdi. Osy kezge deıin elimizdiń aýmaqtarynda jumys isteıtin úsh oqý-jattyǵý atom reaktory bar. Biri – Almatyda, ekeýi – Kýrchatov qalasynda. Biz jumys barysynda tyǵyz baılanystamyz. Mamandar jaǵy jetkilikti, áli de yntaly túlekterdi negizgi mamandyqtarǵa elimizdiń úsh óńirindegi joǵary oqý oryndary daıarlaýda, – deıdi Iadrolyq fızıka ınstıtýty bas dırektorynyń óndiris jónindegi orynbasary, fızıka-matematıka ǵylymdarynyń kandıdaty Evgenıı Ermakov.