Jas kezinde istegen beınettiń qartaıǵanda zeınetin kórý – árkimniń armany. Biraq eldegi zeınetaqy júıesi de - basynan daý arylmaǵan salanyń biri.
Byltyr qazaqstandyqtarǵa 2,6 trln-nan astam teńgege zeınetaqy tólendi, dep habarlaıdy Almaty-akshamy.kz QR Eńbek jáne áleýmettik qorǵaý mınıstrliginiń baspasóz qyzmetine silteme jasap.
2021 jyly respýblıkalyq búdjetten bazalyq zeınetaqy tóleýge 819,3 mlrd teńge, yntymaqty zeınetaqy tólemderine – 1 trln 850,4 mlrd teńge baǵyttaldy,
2021 jylǵy jeltoqsanda respýblıkalyq búdjetten zeınetaqy tólemderine 222,5 mlrd teńgeden astam, onyń ishinde bazalyq zeınetaqyny tóleýge – 68,5 mlrd teńge, yntymaqty zeınetaqyny tóleýge – 154 mlrd teńge baǵyttaldy.
2022 jylǵy 1 qańtardaǵy jaǵdaı boıynsha zeınetkerler sany 2 mln 249 myń adamdy quraıdy.
Eske salaıyq, 2018 jylǵy 1 shildeden bastap memlekettik bazalyq zeınetaqy tólemi, zeınetaqy júıesindegi tájirıbesin eskere otyryp, ár alýshyǵa jeke taǵaıyndalady.
Bul rette 1998 jylǵy 1 qańtardaǵy jaǵdaı boıynsha yntymaqty júıede jumys istegen ýaqyty, sondaı-aq mindetti zeınetaqy jarnalary tólengen kezeńder (budan ári – MZJ) zeınetaqy júıesindegi eńbek ótiline qosylady.
Sonymen, eger zeınetaqy júıesindegi jumys ótili 10 jyl nemese odan az bolsa, sondaı-aq eger múlde joq bolsa, bazalyq zeınetaqy eń tómengi kúnkóris deńgeıiniń 54%-yn quraıdy, sodan keıin 10 jyldan asqan ár jyl úshin onyń mólsheri 2%-ǵa artady. Mysaly, eger siz 20 jyl qatyssańyz, bazalyq zeınetaqy kúnkóris deńgeıi qunynyń 74%-dy, 30 jyl – kúnkóris qunynyń 94%-yn quraıdy. 33 jáne odan da kóp jyl jumys ótili bolsa, kúnkóris qunynyń 100% joǵary mólsherinde belgilenedi.
Eger bir aı ishinde MZJ Biryńǵaı jınaqtaýshy zeınetaqy qoryna birneshe ret jasalsa, jınaqtaýshy júıege qatysý merzimi bir aıdy quraıdy.
Osylaısha, mindetti zeınetaqy jarnalary neǵurlym turaqty jáne tolyq salynatyn bolsa, zeınetaqy jasyna jetkende bazalyq zeınetaqy tólemderiniń mólsheri soǵurlym kóp bolady.
Óz kezeginde, jasyna baılanysty zeınetaqy tólemderiniń mólsheri 1998 jylǵy 1 qańtardaǵy jumys ótiline (kem degende 6 aı qajet) jáne zeınetkerlikke deıingi kezeńde alynǵan ortasha aılyq tabysqa baılanysty bolady.