Nobel Fest halyqaralyq festıvaliniń ashylý sesıasy aıasynda qazaqstandyq kásipker jáne mesenat Islambek Saljanov Qazaqstandy zamanaýı álemde aıtarlyqtaı ilgerilete alatyn tehnologıalar týraly aıtty, dep habarlaıdy Almaty-akshamy.kz.
Bıznesmen atap ótkendeı, ınternetti blokcheın tehnologıalar, jasandy ıntellekt, keńeıtilgen jáne vırtýaldy shyndyq, Big Data, fınteh, bıomedısına, kvanttyq kompúterler, jasyl energıa almastyryp otyr.
«Búginde Qazaqstannyń biregeı tarıhı múmkindigi bar, biz odan aıyrylyp qalmaýymyz kerek. Bul – tehnologıalyq transformasıa kezinde ǵana ashylatyn múmkindik. Dál úshinshi ónerkásiptik revolúsıa Azıa jolbarystaryna damýda sekiris jasaýǵa jáne álemdegi ınovasıalyq kóshbasshy bolýǵa kómektesken edi. Al búgin Qazaq barysynyń tehnologıalyq sekiris jasap, qazaqstandyq jas ǵalymdar men ınnovatorlardyń talanttary men qabiletterin álemge kórsetetin kezi keldi. Qazir tehnologıalyq revolúsıa ýaqyty, jańa tehnologıalardy jasaý úshin tereń tarıhı tájirıbe qajet emes, óıtkeni bul tehnologıalardyń ózi álem úshin jańa», - dedi Islambek Saljanov.
Ol óziniń baıandamasynda, Qazaqstandy joǵary tehnologıalyq damyǵan elge aınaldyrý – Qazaqstan Prezıdentiniń Úkimet aldyna qoıǵan basym mindetteriniń biri ekendigin atady. Onyń aıtýynsha, búgingi kúni qazaqstandyq kásipkerler ózderiniń startaptaryn qura otyryp, ınovasıalyq ónimderimen jáne qyzmetterimen álemdik naryqqa shyǵyp keledi.
Bilim, ǵylym jáne ınovasıalardy damytý boıynsha Nobel festıvaliniń mısıasyn otandyq jáne halyqaralyq uıymdar, onyń ishinde festıváldiń bas seriktesi, Qazaqstannyń eń iri qoǵamdyq qorlarynyń biri «Altyn Qyran Foundation» qoldap otyr.