Almatyda "Ana tilimizdi ardaqtaıyq!" baıqaýynyń jeńimpazdary saltanatty túrde marapattaldy
Halyqaralyq «Qazaq tili» qoǵamynyń Almaty qalasy fılıaly men «Qazaq gazetteri» JSHS-i quramyndaǵy «Ana tili» respýblıkalyq gazeti oqyrmandar arasynda ótkizgen «Ana tilimizdi ardaqtaıyq!» atty vıdeorolık baıqaýynyń qorytyndysy shyqty.
"Qazaq gazetteri" JSHS Almaty qalasy basylymdarynyń jetekishisi Dýman Anashtyń aıtýynsha, baıqaýdyń maqsaty - oqyrmandy memlekettik tildiń mártebesin kóterý jáne nasıhattaýdy jańa tehnologıa men trendter arqyly júzege asyrýǵa shaqyrý boldy.
"Ana tili" gazetiniń bas redaktory Erlan Júnis:
- Baıqaýǵa 50 shaqty jumys keldi. Onyń ishinde baıqaý formatyn durys túsinbegendikten, jaramaı qalǵan jumystar da boldy. Jaqsy rolıkter de barshylyq. Qazylar alqasy olardy iriktep, ishinen 3 jeńimpazdy anyqtady. Jambyl, Qyzylorda jáne Mańǵystaý oblystarynan kelgen úsh oqyrmanymyz jeńimpaz atandy. Olar "Ana tiline" shyqqan maqalalar týraly saraptamalyq vıdeokontent jasap, sol arqyly jeńiske jetti.
Halyqaralyq “Qazaq tili” qoǵamy Almaty qalasy fılıalynyń tóraǵasy Qusman Shalabaev:
- Qazaq tiline, ultqa, ult bolashaǵyna qyzmet etý - barshamyzdyń ortaq paryzymyz. Qazirgi "myltyqsyz maıdan" zamanynda til máselesi mańyzdy bolyp tur. Ana tili bárimizge ortaq, til óshse, ult óshedi. Sony umytpaýymyz kerek. Osy maqsatta 1989 jyldan beri "Qazaq tili" qoǵamynyń ystyq-sýyǵyna tózip júrgen azamattar jeterlik. "Ana tili" gazetiniń oqyrmandary kóbeıse, qazaq tiline, ulttyq sana-sezimge, ıdeologıaǵa degen kózqaras oıanatyn shyǵar degen oımen baıqaýdy ótkizdik. Gazet, kitap oqýǵa degen qyzyǵýshylyq báseńdegen zamanda oqyrman tartý, oqýǵa degen qyzyǵýshylyqty oıatý úshin jasalyp otyrǵan shara jemisin beredi dep oılaımyz.
Baıqaýdyń úzdik úshtigi:
İ oryn – Qasymhan Tólendıev - Jambyl oblysy,
iPhone 14;
İİ oryn – Saǵıra Ýálı - Qyzylorda,
Apple Watch saǵaty;
İİİ oryn – Rysgúl Ramazanova -Mańǵystaý oblysy, Apple AirPods.
Baıqaýdyń marapattaý sharasyna Qalı Sársenbaı, Káken Qamzın, Amalbek Tshanov, Qanseıit Ábdezuly, Ulyqpan Sydyqov, Mamaı Ahetov, Bolat Múrsálim, Erjan Tólek, 92-mektep dırektory Kúljan Shajabaeva jáne basqa qoǵam qaıratkerleri, baspasóz qyzmetkerleri men stýdentter qatysty.
Jıyn barysynda Qalı Sársenbaıǵa Halyqaralyq "Qazaq tili" qoǵamynyń Joǵarǵy dárejeli “Qazaq tili” ordeni tabystaldy. Sonymen qatar, "Ana tili" gazetiniń tilshisi Baǵdagúl Balaýbaeva men "Egemen Qazaqstan" gazetiniń tilshisi Arman Oktábrge qoǵam atynan arnaıy marapattar tabystaldy.
"Qazaq gazetteri" seriktestigi qazylar alqasynyń múshesi, profesor Káken Qamzınge qazaqy dástúrmen shapan japty.