Respublica partıasy AES qurylysy boıynsha referendým qarsańynda azamattardyń pikirin erkin jáne ashyq bildirý úshin jaǵdaı jasaýǵa, sondaı-aq barlyq qazaqstandyqtardyń kózqarastaryn adal jáne obektıvti túrde eskerý qajettigin atap ótti, dep habarlaıdy aqshamnews.kz
Partıa bul týraly arnaıy málimdeme jasady.
«Indýstrıalandyrý men tehnologıalyq progreske umtylý barysynda adamzat dástúrli energıa kózderin – munaı, kómir jáne gazdy paıdalanýdyń klımattyq ózgeristerge jáne ekologıalyq jaǵdaıdyń nasharlaýyna ákelgenin baıqamaı qaldy. Qazaqstannyń bul resýrstarǵa baı ekenine qaramastan, olardy ári qaraı paıdalaný jerimiz úshin aýyr saldarǵa soqtyrýy múmkin», – delingen partıa málimdemesinde.
Sondaı-aq, energıa tapshylyǵy artyp kele jatqan jaǵdaıda elge senimdi jáne ekologıalyq taza energıa kózderi qajet ekeni atap ótildi.
«Atom energetıkasy bizdiń ekonomıkamyzdyń qajettilikterin qanaǵattandyrýda mańyzdy ról atqarýy múmkin. Memleket basshysy aǵymdaǵy jyldyń 2 qyrkúıeginde Qazaqstan halqyna Joldaýynda atap ótkendeı, biz tez ósip kele jatqan qajettilikterdi qanaǵattandyrý úshin atom energetıkasyn damytýǵa nazar aýdarýymyz kerek. Degenmen, progres jolynda tarıhı qorqynyshtarǵa negizdelgen atomofobıa tur. Búgingi zamanaýı tehnologıalar atom energetıkasynyń qaýipsizdigin joǵary deńgeıde qamtamasyz etedi. Bul qorqynyshtardy jeńip, erteńgi kúnge senimmen qaraý mańyzdy. Bolashaq – jasyl energetıkada, sonyń ishinde atom energetıkasynda», – dep málimdedi partıa ókilderi.
Partıa shtabynyń otyrysynda AES qurylysynyń negizgi aspektileri, sonyń ishinde ǵylymdy damytý jáne jumys oryndaryn qurý máseleleri talqylandy.
«Joba jańa jumys oryndaryn ashyp, ǵylymı zertteýlerdi yntalandyryp, qosymsha ınvestısıa tartýǵa yqpal etedi. Sonymen qatar, atom energetıkasyn damytý salyq túsimderiniń artýyna jáne ınfraqurylymnyń jaqsarýyna ákelip, eldiń áleýmettik-ekonomıkalyq jaǵdaıyna oń áserin tıgizedi», – dep atap ótti partıa ókilderi.