Elimiz táýelsizdikke qol jetkizip, derbes memleketke aınalǵanymyzǵa 33 jyl tolýyna oraı Almatydaǵy 107 lıseıde «Táýelsizdik – tiregim» atty merekelik kesh uıymdastyryldy.
İs-sharaǵa elimizdiń táýelsizdigi men eldigin jyryna arqaý etip júrgen aıtýly aqyn, halyqaralyq «Alash» ádebı syılyǵynyń laýreaty, S. Muqanov pen Ǵ. Músirepov atyndaǵy memlekettik ádebı-memorıaldyq mýzeı kesheniniń dırektory Ádilǵazy Qaıyrbekov qurmetti qonaq retinde shaqyryldy. Merekelik keshke lıseı dırektory Úmithan Aqatanuly, onyń orynbasarlary Baqtygúl Dosynbekova men Ǵıbrat Japbasbaeva bastaǵan ujym músheleri, ustazdar men oqýshylar qatysty.
Alǵashqy sóz kezegi Ádilǵazy Jaqsylyqulyna berildi. Ol el táýelsizdigi men jeltoqsan oqıǵasy týraly tereń oı qozǵap, sol kezeńdegi óz estelikterimen bólisti. Aqynnyń «Jeltoqsan jańǵyryǵy» poemasynan úzindi oqyp berýi jınalǵandarǵa erekshe áser etti. Sonymen qatar ol jeltoqsan oqıǵasynyń qaharmandarynyń biri, qazirgi Májilis depýtaty Nurtaı Sabılánov týraly jazǵan kitabynan syr shertti. Qatysýshylar aqynnyń ár sózin uıyp tyńdady.
Kesh barysynda tarıh pániniń muǵalimi Aıgúl Jumabekovanyń jetekshiligimen lıseıdiń 8-synyp oqýshylary jeltoqsan oqıǵasy men qaharmandary týraly qoıylym qoıdy. Shákirtterdiń daıyndyq deńgeıi joǵary boldy, qoıylym kórermenderdi erekshe áserge bóledi. Jeltoqsan oqıǵasynyń dramalyq kórinisteri jınalǵandardyń júregin tolqytyp, janyn tebirentti.
Sonymen qatar, merekelik kesh aıasynda oqýshylardyń «Jas ulan» uıymyna qabyldaý rásimi ótti. Talapkerler patrıottyq sezimmen ant qabyldap, Otanyn súıýge, memlekettik rámizderdi qurmetteýge, úlkenge qurmet, kishige izet kórsetýge sert berdi. Aqyn Ádilǵazy Qaıyrbekov pen lıseı dırektory Úmithan Aqatanuly «Jas ulanǵa» qabyldanǵan oqýshylarǵa tósbelgi men galstýk taǵyp, olarǵa aq jol tiledi.
Kesh sońynda lıseı dırektory Úmithan Aqatanuly qorytyndy sóz sóılep, kórnekti aqyn Ádilǵazy Qaıyrbekovke alǵys bildirdi. Aqynǵa ıyǵyna shapan jaýyp, shyǵarmashylyq tabys tiledi. Óz kezeginde Ádilǵazy Jaqsylyquly da lıseı ujymyna rızashylyǵyn bildirip, óziniń «Jandaýa» jyr jınaǵyn syıǵa tartty.
Merekelik kesh lıseı oqýshylarynyń óner kórsetýlerimen jalǵasty. Kúmbirlegen kúı, syzylǵan án, shabytty jyr jınalǵan qaýymdy rýhtandyryp, keshti erekshe áserli etti.
Bul kesh – táýelsizdigimizdiń qymbat ekenin sezindiretin, rýhanı azyq syılaǵan mazmundy ári maǵynaly shara boldy.