Otandyq sportshylar sátti óner kórsetti
Elimizdiń Mádenıet jáne sport mınıstrliginiń dereginshe, TMD elderi arasyndaǵy sport oıyndarynda boksshylar básekesi máresine jetti, dep habarlaıdy Almaty-akshamy.kz.
Keshe jartylaı fınal qorytyndysy boıynsha, aqtyq synǵa shyqqan 6 bylǵary qolǵap sheberimizdiń tórteýi óz salmaǵynda qarsylas shaq keltirgen joq. Jalpy, bul jarysta 26 salmaqta (13-i uldar, 13-i qyzdar arasynda) júlde jıyntyǵy sarapqa salyndy desek, boksshylarymyz sonyń 21-inde medal oljalady (4 altyn, 2 kúmis pen 15 qola).
48 kelide Anıta Adısheva ózbekstandyq Robıahon Bahtıórovany, 54 kelide Vıktorıa Baıdýkova reseılik Evıta Averánovany senimdi utty. Sonymen qatar 60 kelidegi Uljan Sársenbek te ózbekstandyq Mýhlısa Tohırovadan basym tússe, uldar arasynda fınalǵa joldama alǵan jalǵyz boksshymyz Myrzahan Máýlenov (66 kg) Belarýs sportshysy Vladıslav Kýznesovtan myqty ekenin kórsetti.
Al Baqyt Seıdish (70 kg) pen Tomırıs Myrzaqul (52 kg) fınalda qarsylasyna jol berdi. Alǵashqysy ózbekstandyq Oısha Toırovadan, ekinshisi reseılik Anastasıa Koolden utyldy. Qola júldege ıe bolǵan boksshylar: Jandarbek İzbasarov (44-46 kg), Islam Mashkentaev (48 kg), Suńǵat Rasýlov (50 kg), Nurıslam Qaldybaev (52 kg), Madıar Otar (54 kg), Erasyl Mustafınov (57 kg), Ersultan Tólegen (60 kg), Ádil Qasymov (63 kg), Álınur Ómirbekov (70 kg), Batyrhan Seıtenov (75 kg), Nurasyl Baýyrjan (80 kg), Delfına Ábilhan (44-46 kg), Karına Toqýbaı (50 kg), Arýjan Jańabaeva (66 kg), Nazerke Rysbaı (80 kg).
Qazaqstan boks básekesinde 15 altyny bar Reseı men 7 altyny bar Ózbekstannan keıingi úshinshi orynǵa jaıǵasty. Aıta keteıik, saıysqa 2005-2006 jyly týǵan, ıaǵnı 15-16 jastaǵy jas bylǵary qolǵap sheberleri qatysty.