Italıanyń Býsto-Arsısıo qalasynda bokstan Parıj Olımpıadasynyń lısenzıasy úlestiriletin álemdik týrnır óz máresine jetti.
Qazaqstan quramasynyń erler jáne áıelder arasyndaǵy 11 boksshysy (6 er, 5 áıel) qatysyp, ulttyq qurama qorjynyna Parıj Olımpıadasynyń bes joldamasyn saldy, dep habarlaıdy almaty-akshamy.kz.
Atap aıtar bolsaq, Parıjdegi Olımpıa oıyndaryna joldamalardy erler básekesinde Tokıo Olımpıadasynyń qola júldegeri, álem chempıony Sáken Bıbosynov (51 kg), álem chempıony Sabyrhan Mahmud (57 kg), álem jáne Azıa chempıony, Azıa oıyndarynyń júldegeri, ulttyq qurama kapıtany Aslanbek Shymbergenov (71 kg), álem chempıony Nurbek Oralbaı (80 kg) jáne 2018 jyly Argentınanyń Býenos-Aıres qalasynda uıymdastyrylǵan jasóspirimder Olımpıadasynyń jeńimpazy Aıbek Oralbaı (92 kg) jeńip aldy.
Ókinishke qaraı áıelder quramasy lısenzıaǵa qol jetkize almady.
«Bokstan Italıadaǵy Olımpıadaǵa irikteý týrnırinde sátti óner kórsetip, Parıjdegi dúbirli dodaǵa joldama jeńip alǵan bylǵary qolǵap sheberlerin quttyqtaımyn. El jankúıerleri qashan da boksshylardan úzdik nátıje kútedi. Sizder bul joly jankúıerlerdiń senimin aqtap, ulttyq qurama qorjynyn mańyzdy lısenzıalarmen tolyqtyrdyńyzdar. Endi Olımpıadaǵa daıyndyqty kúsheıtip, Parıj tórinde top jarýlaryńyzǵa tilektespin», dedi Ermek Marjyqpaev.
Aıta keteıik, barlyǵy erler arasynda Olımpıadanyń 28, áıelder arasynda 21 joldamasy úlestirildi. Eske sala keteıik, buǵan deıin bokstan Qazaqstan enshisinde eki joldama bar edi. Hanchjoýdaǵy jazǵy Azıa oıyndarynda asa aýyr salmaqtaǵy Qamshybek Qońqabaev pen Karına Ibragımova (57 kg) Parıj Olımpıadasyna barýǵa múmkindik alyp qoıǵan bolatyn.