Kúni keshe World Boxing uıymynyń basshysy bolyp taǵaıyndalǵan, Qazaqstannyń Ulttyq olımpıadalyq komıtettiń prezıdenti, áıgili boksshy Gennadıı Golovkın mansabyndaǵy jańa kezeńi týraly otandyq BAQ-tyń birine áńgimelep berdi. Tolyǵyraq Aqshamnews.kz tilshisiniń materıalynda.
Sıfrlandyrý baǵyty sportqa qanshalyqty kerek?
Gennadıı Golovkın jańa qyzmeti jaıly áserin bólisti. Onyń aıtýynsha, sıfrlandyrý baǵyty sportqa da qajet.
"Sıfrlandyrý baǵyty boksqa óte qajet dep esepteımin. Óıtkeni mundaı júıeler basqa sport túrlerinde de qoldanylady. Burynǵy Olımpıada oıyndary men týrnırler tájirıbesi kórsetkendeı, qarapaıym kórermen úshin bári anyq, túsinikti boldy: upaı qalaı esepteledi, onyń sebebe nede ekeni - bári kórinip turady. Rıngte ne bolyp jatqanyn túsiný boksqa degen qyzyǵýshylyqty qaıtarady" dedi ol.
sýret: https://www.instagram.com/gggboxing/
"Bizdiń mindetimiz - bokstaǵy jemqorlyqty azaıtý"
Golovkın sporttaǵy, ásirese bokstaǵy ádiletsizdik týraly da aıta ketti. Ol jemqorlyq, jeńisti satyp alý syndy las dúnıelerdi tolyq joıyp jiberýdi tek armandaýǵa bolatynyn basa aıtty.
"Ádiletsiz kózqarast kez kelgen sportta bar. Bizdiń mindetimiz – osynyń bárin barynsha azaıtý. Tolyq joıyp jiberý týraly tek armandaýǵa bolady. Adam faktoryn múlde alyp tastaý múmkin emes. Jańa júıege de beıimdelip alǵysy keletinder tabylady. Biraq júıe barynsha ashyq bolsa, barlyq sportshy men komandalar bir deńgeıde, bir jaǵdaıǵa ıe bolady. Biz ózgeristerdi baqylap, jaǵdaıdyń qalaı órbıtinin kórip, jaqsy jaǵyna ózgertý úshin únemi jumys isteıtin bolamyz", - dep qosty ol.
Sondaı-aq, ol osyndaı ádiletsizdikterden qashyp kásipqoı boksqa aýysqanyn jetkizdi.
"Al ózime kelsek, ıá, rasynda men de dál osy nárselerden qashyp, kezinde kásipqoı boksqa kettim. Sol sebepti qazir qaıta oraldym. Osyndaı ádiletsiz, jemqorlyq jaǵdaı tym kóp. Boks – tek rıngtegi qarsylaspen emes, keıde búkil júıemen kúresetin sport", - deıdi Golovkın.
"Men bul jerge sheneýnik retinde emes, sportshy retinde keldim"
Gennadıı myrza, qos qyzmetti (UOK prezıdenti jáne World Boxing uıymynyń basshysy qyzmeti - esk.) qatar alyp júrýdiń qıyn emesin jáne osynsha jasynda shabytty qaıdan alatynyn da áńgimelep berdi.
"Qazir menimen kóbi sanasady, men ony túsinemin. Men jaı ǵana "ataǵy bar boksshy" emespin. Halyqaralyq tájirıbem, jaqsy repýtasıam da bar. 15 jyldan beri óz promoýterlik kompanıamdy júrgizip kelemin - munyń bári áser etedi. Eń bastysy - men bul júıege "sheneýnik" retinde emes, sportshy retinde keldim. Bireýdiń tanysy nemese "áke-kókemen" qoıylǵan adam emespin. Eń joǵary deńgeıdegi sportta talaı jyl istegen, tájirıbesi bar kásibı boksshy retinde keldim", - deıdi sportshy.
Sonymen qatar, Golovkın UOK-tegi qyzmetin tastaýǵa nıetti emes ekenin jetkizdi.
"Eń bastysy – osyny bári bilsinshi: men UOK-ten ketýge nıettenip otyrǵan joqpyn. Qazaqstan – meniń Otanym. Men ony halyqaralyq deńgeıde barynsha joǵary dárejede tanystyrǵym keledi. Óz tanymaldylyǵymdy, baılanystarymdy eń aldymen elimniń sporttyq bedeli úshin qoldanamyn", - dedi ol.
sýret: Reuters
Olımpıadadaǵy boks taǵdyry jáne qoshtasý jekpe-jegi qashan?
Gennadıı Golovkınniń aıtýynsha, Los-Andjelestegi aldaǵy Olımpıada oıyndarynda boksty baǵdarlamadaǵy sport túrleriniń qatarynan alyp tastaý týraly sóz bolǵan. Sporttyń aınalasynda quqyqtyq ári uıymdyq daýly máseleler kóbeıgen kezde Halyqaralyq olımpıadalyq komıtet oǵan senim artyp, "tártipke keltirýge kómektesedi" dep jaýapkershilikti soǵan júktegen, al ol muny el úshin de, ózi úshin de úlken qurmet dep qabyldaǵanyn aıtty.
"Halyqaralyq olımpıadalyq komıtet meniń kandıdatýrama senim artty. «Bul salany tártipke keltirýge kómektesedi» dep, jaýapkershilikti maǵan júktedi. Sol úshin olarǵa óte rızamyn", - dedi Golovkın.
Sonymen birge ol onyń atyn paıdalanyp "haıp" jasaǵysy keletinderge de renishin jasyrmaıdy:
"Men sportshylarǵa týǵan inilerimdeı qaraımyn, sondyqtan ishki shabýyldar men úshin qoǵamnyń derti sıaqty. Tanymalmyn eken dep, bilgenińdi isteýge bolmaıdy", – deıdi ol.
Al qoshtasý jekpe-jegine qatysty: "Eshqashan “eshqashan” deme, biraq báriniń óz ýaqyty bar", – dep, rıngke oralý múmkindigin ashyq qaldyrǵanymen, qazir basty nazaryn reformalar men bokstyń bolashaǵyna aýdaryp otyrǵanyn jetkizdi.