Almatyda M.Áuezov atyndaǵy qazaq ūlttyq akademıyalyq drama teatry 100-shí mausymynyń shymyldyǵyn ashty. Ruhanıyat ordasy ǵasyrlyq beleske oraı merekelík kontsert ūıymdastyrdy.
Saltanatty jıynda Qazaqstannyń óner jáne mádenıet qaıratkerlerí teatr ūjymyn mereıtoılyq mausymnyń ashyluymen qūttyqtap, óner ordasynyń ūlttyq mádenıettegí aıryqsha orny men tarıhı rólín atap óttí. Merekelík kontsertte teatrdyń 100 jyldyq tarıhynda sahnalanǵan áıgílí qoıylymdardyń úzíndílerí kórsetílíp, kórermen qauymǵa teatr shejíresíníń altyn qorynan erekshe kóríníster ūsynyldy. Osylaısha teatr súıer jūrtshylyq jańa mausymda ákemteatrdyń qazaq mádenıetíndegí orny men taǵylymdy jolyn taǵy bír márte sezíndí. Sondaı-aq, sahnada teatrdyń tórt buyn ókílderí bírge óner kórsetíp, ruhanıyat ordasynyń dástúr sabaqtastyǵyn kórsettí.
Almaty qalasynyń ákímí Darhan Satybaldynyń qūttyqtau sózín qala ákímíníń orynbasary Abzal Núkenov jetkízdí:
«Mūhtar Áuezov atyndaǵy Qazaq ūlttyq akademıyalyq drama teatrynyń ǵasyrlyq beleske qadam basyp, júzínshí mausymnyń saltanatty ashyluymen shyn júrekten qūttyqtaımyn! Qazaq óneríníń qara shańyraǵy ūlt mádenıetíníń kósh basynda bolyp, elímízdíń maqtanyshyna aınaldy. Alǵash shymyldyǵyn «Eńlík–Kebekpen» ashqan ákem teatrda Serke Qojamqūlov, Qalıbek Quanyshbaev, Elubaı Ómírzaqov, Sháken Aımanov syndy tūlǵalar óner kórsettí. Teatr Prezıdent Qasym-Jomart Kemelūly Toqaevtyń Jarlyǵymen ūlttyq teatr mártebesíne ıe boldy. Ákem teatrdyń jańa ǵasyry – ūlttyq ónerdíń jańǵyru ǵasyry bolsyn!», delíngen qūttyqtau sózínde.
– Būl tegín data emes, – deıdí Mūhtar Áuezov atyndaǵy Qazaq ūlttyq akademıyalyq drama teatrynyń dırektory Erkín Juasbek.
Osyndaı dataly mausymǵa bírínshí jetíp otyrǵan írgelí ūjym retínde ónersúıer kórermenge degen úlken saǵynyshymyzdy da jetkízeıík dep, búgín osyndaı mereke jasauǵa sheshím qabyldadyq. Halyq ta bízdí saǵynyp qalǵan eken, oǵan ózderíńíz kuá boldyńyzdar. Míne, sahnadan teatrymyzdyń barlyq shyǵarmashylyq qūramyn shyǵaryp, eń úlkenímíz Asanálí Áshímov bastap oınaǵan spektaklderden úzíndí beríp, merekelík hám sahnalyq sán-saltanatymyzdy kórsettík. Būl teatr súıer qauymǵa, sahna súıer qauymǵa jaqsy mereke boldy dep oılaımyn, – dedí teatr dırektory.
Ūlttyq ruhanıyattyń memlekettík sımvoly
"Qazaq óneríníń qara shańyraǵy, ūlttyq ruhanıyattyń memlekettík sımvoly – M.Áuezov atyndaǵy teatr. Bír ǵasyr – ońaı uaqyt emes. Júz jyldyq tarıhynda būl sahnada talaı darabozdar óner kórsettí. Alǵashqy buyn – «samorodok sary altyn» akterler tuǵanynan talant bolyp jaratylǵan jandar edí. Olar el íshínen shyqqan, tabıǵı darynymen teatrdy qalyptastyrǵan tūlǵalar. Búgín sol dástúrdí olardyń nemere-shóbereleríndeı keıíngí buyn jalǵap keledí. Qazír teatrda Asanálí Áshímov bastaǵan aǵa buynnan bastap tórt buyn ókílderí qatar qyzmet etedí", - deıdí Qazaqstannyń eńbek síńírgen qaıratkerí, teatrtanushy Álıya Bópejanova.
Ár dáuírdíń akterlík órnegí ártúrlí bolǵanymen, úırener nárse ózgermeıdí. Eń basty taǵylym – ónerge degen mahabbat, el men ūltqa degen mahabbat. Akter ózín emes, ónerdí, halyqty, eldí súıe bíluí kerek. Teatr – ízgílíktíń ortasy. Teatr tárbıeleıdí dep aıtyp jatady. Bíraq teatr tárbıelemeıdí, teatrǵa kelgen adamnyń jany nūrlanady. Teatr – óte úlken qoǵamdyq ınstıtut.
Shyn mánínde, ómírdíń negízí – qarapaıym eńbek adamdary, kúndelíktí tírshílík, bízdíń táuelsíz elímízdíń jetístíkterí. Jasampazdyqty, eńbek adamyn, ómírdíń shynaıy reńín kórsetu – qazaq teatrlarynyń aldynda tūrǵan úlken míndet. Teatrda ūlttyq klassıka da, sheteldík dramaturgıya da bar, bíraq búgíngí zamannyń beınesín tereńírek beru kerek.
Kınony qaıtalap kóruge bolady, al teatr – jandy qarym-qatynas. Sahna men kórermen arasyndaǵy sol energıya adamǵa erekshe áser beredí. «Sherhan Mūrtazanyń «Teatr kóbeıse, túrme azayady» degen sózí bar. Teatrǵa kelgen adam jaqsylyq pen jamandyqtyń shekarasyn aıqyn sezíníp, janyn tazartyp shyǵady. Sondyqtan teatrǵa barudy mádenı ádetke aınaldyru kerek.
· Aqshamnyń anyqtamasy
*Ákemteatr shymyldyǵy alǵash ret Qyzylorda qalasynda 1926 jyly 13 qańtarda M.Áuezovtíń «Eńlík–Kebek» pesasymen ashyldy.
* 1929 jyly teatr truppasy Almatyǵa qonys audardy.
* 1937 jyly 27 aqpanda akademıyalyq teatr ataǵyn aldy.
*1946 jyly Eńbek Qyzyl Tu ordení men marapattaldy.
*1976 jyly «Halyqtar dostyǵy» ordenímen marapattaldy.
*1961 jyly teatrǵa jazushy, ǵalym Mūhtar Omarhanūly Áuezovtíń esímí beríldí.
*2020 jyldyń 20 jeltoqsanynda Qazaqstan Respublıkasynyń Prezıdentí Q.Toqaevtyń arnaıy Jarlyǵymen teatrǵa «ŪLTTYQ» mártebesí beríldí.