Sabyrly adam - altyn adam
Jahannyń qaryshtap damyp bara jatqan memleketterinde ashýdy tejeýge baılanysty túrli ádis-tásilderdi úıretetin semınarlar ótedi. Solardyń kóshin kúnshyǵys eli Japonıa, Qıyr Shyǵystaǵy Ońtústik Koreıa bastap tur. Dálirek aıtsaq, olarda arnaıy ortalyqtar bar. Onda shyny syndyryp, balǵalap, boıyńyzdaǵy stresti tysqa shyǵarasyz. Osyǵan qatysty saýalnama júrgizgen edik.
Aısara ÁBİKEN,
stýdent:
– Ózderińiz biletindeı, stýdenttiń negizgi tirshiligi – oqý. Ásirese, emtıhanda qobaljımyz. Al qalǵan ýaqytta shákirtaqyny kútemiz. Ony da únemdep jaratý qajet. Áıtpese, Almatydaı alyp megapolıste ash qalasyz. Munda árkim ózdi-ózimen. Sondyqtan qosymsha jumys jasaımyn. Bizder býkletter, kóshirme, qaǵaz basý isimen aınalysamyz. Qarap júrgennen góri is qylsańyz, qaltańyzǵa qarajat túsedi. Jalpy, ózimdi qatty kúızeliske túsirmeımin. Olaı bolǵannan eshteńe shyqpaıdy. Qalypty, ómir súrgendi durys kórem.
Erjigit AIDAR,
daıashy:
– Óte mańyzdy suraq qoıdyńyz. XXI ǵasyrdyń aktýaldy taqyryby dep bilem. Nege deseńiz? Óıtkeni, bári qarbalas. Pandemıa jaǵdaıynda daıashy bolyp isteýge týra keldi. Qazir halyqaralyq qatynastar mamandyǵynda oqýdamyn. Sabaq onlaın, 3 kýrstamyn. Arasynda djı-djıtsýǵa baramyn. Sporttyq seksıaǵa qatysqandy jaqsy kóremin. Sonda dostarymmen jekpe-jekke shyǵyp, ashýdy tarqatyp alamyn. Al, daıashylyq qyzmette neshe túrli adamdy kóresiz. Qysqasy, júıkeń myqty bolýy kerek. Menińshe, er jigit barlyq jaǵynan myqty júrgeni jón.
Bıbigúl SHARABEKOVA,
psıholog:
– Qazirgi tańda kópshiligimizde «ego» basym. Menmenshildik halqymyzdyń mentalıtetinde quptalmaıdy. Al shetelde qalypty sanalady. Biraq, bizdiń óz jolymyz bar. Abaı atamyz «ózińe sen, ózińdi alyp shyǵar, aqylyń men qaıratyń eki jaqtap» dep naqyl qaldyrǵan eken. Dál osy támsil búgingi kúnge dóp kelýde. Adamnyń ǵumyrynyń belgili shkalasy bar. Sondyqtan eńseńdi kóterip, jadyrap ómir súrýge keńes beremin. Qalǵany óz jaıyn tabady.
Ánápıa QALDYBAEV,
zeınetker:
– Balam, aldyńdaǵy atań talaıdy kórdi. Jasym 70-ten asty. Qyzmetti de istedik. Sondaǵy meniń túıgenim, jigerli, temirdeı berik, quryshtaı qarýly adam bolý qajet-aý. Maıda men shúıdeni termegen abzal. Mundaı adamdyqqa jat. Saǵan qol sozǵan, demegen jandardy umytpa. Tik júr, nyq sóıle. Sonda aldyń jaryq, qadamyń gúlge aınalady. Kópshilik jastarǵa razymyn. Birneshe jerde jumys jasaıdy, bir jaǵynan oqıdy. Minekeı, sondaı qarakózderimizdi naǵyz shyńdalý ústindegi órender dep sanaımyn. Aınalaıyndar, ashýǵa boı aldyrmańdar. Tek alǵa, maqsatqa jetpeı aıaldamańdar!
Zamanynda Áıteke bı babamyz «ashý degen – aǵyn sý, aqyl degen - darıa» dep qanatty sóz qaldyrypty. Qandaı ǵajap aıtylǵan dúnıe! Joǵarydaǵy pikirlerdi ushtastyrǵanda, soǵan barady. Az ǵana ǵumyrda tatýlyq pen birlikte ǵumyr keshkenge eshteńe jetpeıdi demekpiz.