Sebebi alaıaqtar deldaldar keıpine enýde.
"Biryńǵaı jınaqtaýshy zeınetaqy qory" AQ (BJZQ) sońǵy ýaqytta alaıaqtardyń jalǵan aqparat taratý jaǵdaılarynyń jıilep ketkenin aıtty, dep habarlaıdy Almaty-akshamy.kz
«Qurmetti salymshylar!
Atap aıtqanda, áleýmettik jelilerde jáne onlaın-habarlandyrý platformalarynda zeınetaqy jınaqtaryn jeke basqarýshy kompanıalarǵa nemese saqtandyrý uıymdaryna aýdarý jolymen qolma-qol alý boıynsha deldaldyq qyzmetter kórsetý týraly usynystar jiberiledi. Tek mundaı qyzmeti úshin habarlama ıesi belgili bir kólemdegi syıaqyny talap etedi. "BJZQ" AQ bul aqparattyń shyndyqqa janaspaıtynyn málimdeıdi» delingen qordyń saıtyndaǵy aqparatta.
Jeke basqarýshy kompanıalardyń senimgerlik basqarýyndaǵy nemese zeınetaqy anýıteti sharty boıynsha ómirdi saqtandyrý kompanıalarynda ornalastyrylǵan zeınetaqy jınaqtaryn qandaı da bir deldaldar arqyly alý múmkin emes. Al salymshylarǵa BJZQ-daǵy zeınetaqy jınaqtarynyń eń tómengi jetkiliktilik sheginen asatyn bóligin ǵana zańnamada kózdelgen, turǵyn úı jaǵdaılaryn jaqsartý nemese emdelý maqsattaryna paıdalaný úshin sheship alýǵa ruqsat etiledi.
Alaıaqtar usynǵan sqemalarǵa qatysýǵa kelise otyryp, siz óz aqshańyzdy joǵaltý qaýpin týdyryp qana qoımaı, sonymen qatar bolashaqta basqa alaıaqtyq áreketter úshin paıdalanylýy múmkin jeke derekterińizdiń saqtalýyna da qaýip tóndiresiz.
"BJZQ" AQ óz salymshylaryna sońǵy kezderde jıi taralyp ketken osyndaı "jalǵan" habarlamalardy elemeýge jáne aqparatty tek resmı kózderden ǵana alýǵa qatań keńes beredi.
Siz zeınetaqy jınaqtaryn alý men aýdarýǵa qatysty barlyq suraqtarǵa jaýapty BJZQ bólimshelerinen de, qashyqtyqtan da alyp, aqparattyń senimdiligin bylaısha teksere alasyz:
kóp arnaly tegin baılanys arqyly, baılanys ortalyǵynyń 1418 nómirine qońyraý shalý, sondaı-aq, +7 777 000 1418 nómiri boıynsha WhatsApp arqyly.
BJZQ-nyń Odnoklassnıkı, Telegram, Facebook, Vkontakte, Twitter jáne Instagram sıaqty tanymal platformalardaǵy áleýmettik jelilerdegi resmı paraqshalary arqyly.