Sońǵy ýaqytta áleýmettik jeliler men habarlandyrý platformalarynda zeınetaqy jınaqtaryn alý boıynsha deldaldyq qyzmetterdi usynatyn jarnamalar sany kóbeıip ketti. Bul jarnamalarda azamattarǵa zeınetaqy jınaqtaryn eń tómengi jetkiliktilik sheginen (TJSH) asqan jaǵdaıda tómen paıyzben rásimdep berýge ýáde etilýde, dep habarlaıdy aqshamnews.kz
Osyǵan baılanysty, «Biryńǵaı jınaqtaýshy zeınetaqy qory» (BJZQ) Qazaqstan azamattaryn mundaı kúmándi deldaldyq qyzmetterden saq bolýǵa shaqyrady. BJZQ málimetinshe, zeınetaqy jınaqtaryn paıdalaný QR Áleýmettik kodeksinde qatań belgilengen jaǵdaıda ǵana ruqsat etiledi. Olar:
- Zeınet jasyna tolý;
- 1 nemese 2 toptaǵy merzimsiz múgedektik;
- Shetelge turaqty turýǵa ketý;
- Muragerlik quqyq arqyly.
Sonymen qatar, zeınetaqy jınaqtaryn turǵyn úı jaǵdaılaryn jaqsartý nemese emdelý maqsatynda paıdalaný tek arnaıy ýákiletti operatorlar arqyly, ıaǵnı ekinshi deńgeıli bankter arqyly júzege asady. Bul qyzmetterge eshqandaı deldaldyq qajet emes, al BJZQ bul prosester úshin qosymsha aqy almaıtynyn habarlaıdy.
BJZQ azamattardy eshbir deldaldarǵa aqsha tólemeı, zańdy jáne resmı jolmen óz zeınetaqy jınaqtaryn paıdalaný máselesin sheshýge shaqyrady.