Bakýda Qazaqstannyń Respýblıka kúni atalyp ótti
Qazaqstannyń Ázerbaıjandaǵy Elshiligi Respýblıka kúnine oraı saltanatty qabyldaý ótkizdi, dep habarlaıdy aqshamnews.kz
İs-sharaǵa 900-ge jýyq qonaq qatysty. Merekemen quttyqtaý úshin Ázerbaıjan Parlamentiniń depýtattary, memlekettik organdardyń basshylary men ókilderi, dıplomatıalyq mısıalar men halyqaralyq uıymdardyń jetekshileri, Mańǵystaý oblysynyń ákimdigi ókilderi, ázerbaıjandyq zıaly qaýym, qoǵam belsendileri, bıznes qaýymdastyǵy jáne BAQ ókilderi, sondaı-aq Ázerbaıjanda turatyn qazaqstandyqtar jınaldy.
Qabyldaýdyń resmı bóliginde Qazaqstan men Ázerbaıjannyń memlekettik ánurandary shyrqaldy. Qazaqstannyń Ázerbaıjandaǵy Elshisi Álim Baıel óz sózinde qazaq-ázerbaıjan yntymaqtastyǵynyń tabysty damyp kele jatqanyn atap ótti. Buǵan Prezıdent Q. Toqaevtyń Ázerbaıjanǵa jáne Prezıdent I. Álıevtiń Qazaqstanǵa birneshe ret jasaǵan resmı saparlary dálel. Eki eldiń qarym-qatynasy strategıalyq áriptestikten odaqtastyq deńgeıine kóterildi.
Elshi eki eldiń Orta dáliz (THKB) jáne Kaspıı teńiziniń túbimen talshyqty-optıkalyq baılanys jelisin tartý sıaqty mańyzdy óńirlik jobalardy birlesip ilgeriletip jatqanyn, sondaı-aq bastapqy kapıtaly 300 mıllıon dollardy quraıtyn qazaq-ázerbaıjan ınvestısıalyq qorynyń qurylǵanyn atap ótti.
Sonymen qatar, Elshi qarasha aıynda ótetin COP29 samıtinde Qazaqstan, Ázerbaıjan jáne Ózbekstannyń Ortalyq Azıadan Ázerbaıjan arqyly Eýropaǵa jasyl energıa eksporttaýǵa baǵyttalǵan jańa jobany iske qosatynyn aıtty. «Qazaqstan Ázerbaıjandy COP29 ótkizý mısıasynda tolyq qoldaıdy jáne bul mańyzdy is-sharaǵa belsendi qatysady», – dep qosty Á. Baıel.
Elshi naýryz aıynda eki eldiń Memleket basshylarynyń qatysýymen Qazaqstannyń Ázerbaıjan halqyna syı retinde Fızýlıde salǵan balalar shyǵarmashylyǵy ortalyǵynyń resmı ashylǵanyn, sondaı-aq Almatyda Ázerbaıjan men Armenıa arasynda beıbit kelissózderdiń ótkenin atap ótti.
Sondaı-aq, Á. Baıel Ázerbaıjan Prezıdenti I. Álıevtiń «Bizdiń otbasymyz – Túrki álemi» degen sózin qaıtalaı otyryp, Qazaqstannyń Túrki memleketteri uıymyna tóraǵalyq etip otyrǵan jyly osy uıymnyń 15 jyldyq mereıtoıy atalyp ótip jatqanyn eske saldy.
İs-sharanyń resmı bóliginiń sońynda Á. Baıel Memleket basshysynyń atynan belgili ázerbaıjandyq sarapshy jáne qoǵam qaıratkeri Farhad Mamedovke eki el arasyndaǵy qatynastardy damytýǵa qosqan eleýli úlesi úshin II dárejeli «Dostyq» ordenin tabystady.
Sonymen qatar, is-shara barysynda Mańǵystaý oblysy ákiminiń orynbasary Abat Órisbaev qonaqtarǵa Mańǵystaý oblysynyń ınvestısıalyq jáne týrısik áleýeti týraly prezentasıa usyndy.
Saltanatty qabyldaýda qonaqtarǵa ulttyq taǵamdar men otandyq kompanıalardyń ónimderi usynyldy. Sondaı-aq, ázerbaıjandyq jýrnalıs jáne fotograf Rýstam Gasymovtyń Qazaqstanǵa arnalǵan avtorlyq fotokórmesi ótti. Air Astana jáne FlyArystan áýe kompanıalary Qazaqstanǵa tegin bıletter utysy ótkizdi. Mańǵystaý oblysynan arnaıy kelgen shyǵarmashylyq ujym óner kórsetip, Qazaqstan men Ázerbaıjan avtorlarynyń týyndylary shyrqaldy. Kesh dástúrli án-bımen jalǵasty.