850 dronnyń kómegimen Almatyda Respýblıka kúnine oraı anımasıalyq shoý uıymdastyryldy
2024 jylǵy 25 qazanda Almatyda Respýblıka kúnin merekeleýge oraılastyrylǵan drondar shoýy ótti. Qalanyń myńdaǵan turǵyny men qonaǵy umytylmas kórinisti tamashalaý úshin Abaı alańy men Astana alańyna jınaldy, dep habarlaıdy aqshamnews.kz
Abaı alańynan 500-den astam dron sınhrondy túrde kókke kóterilip, biregeı 3D vızýaldy beıneler jasady. Installásıalar ulttyq mádenıettiń elementterin jáne el tarıhyndaǵy mańyzdy sátterdi beınelep, birlik pen maqtanysh rýhyn erekshe beıneledi. Jaryq shoýy mýzykalyq shyǵarmalarmen súıemeldendi.
Qala turǵyndary men qonaqtary Qazaqstan kartasyn, ańyzǵa aınalǵan Altyn Adamdy, notalar men dombyrany, kók baıraǵymyzdy, Almatynyń biregeı florasynyń sımvoly — qyzǵaldaqty, kúsh pen bostandyqty beıneleıtin keremet qar barysyn jáne Almaty almasy - aportty, qalany kórnekti ǵımarattary men taýlaryn qyzyqtady.
Keıin 21:30-da Astana alańynan aspanǵa taǵy 350 dron kóterildi. Kókte bostandyq pen táýelsizdiktiń sımvoly ispetti qalyqtaǵan búrkittiń beınesi, Qazaqstan kartasy,«KókTóbe» telemunarasy, aspaly jol jáne Almatynyń tanymal kórikti jerleri, beıbitshilik pen otbasylyq ıgiliktiń sımvoly - shańyraq, qalaǵa jáne jalpy bizdiń elge degen súıispenshiliktiń belgisi retinde júrekter beıneledi. Odan bólek, «25 qazan – Respýblıka kúni qutty bolsyn!» degen quttyqtaý sózi paıda boldy.
Astana alańyndaǵy shoý shamamen 20 mınýtqa sozyldy jáne demeýshiler esebinen uıymdastyryldy.
Uıymdastyrýshylar dástúrli otshashýdyń ornyna drondardy paıdalaný — merekeleýdiń ınovasıalyq tásili ǵana emes, sonymen qatar tehnologıalyq damý men ekologıalyq bastamalarǵa degen umtylystyń sımvoly bolǵanyn atap ótti. Bul sheshim qorshaǵan ortaǵa áserdi azaıta otyryp, biregeı vızýaldy effektilerdi jasaýǵa múmkindik berdi.
