Sport – adamnyń erik-jigerin qaıraıtyn, onymen qosa synaıtyn sala. Bul salada jetistikke jetý adamnan erekshe qajyr-qaıratty qajet etedi. Ony dáleldep, eldiń atyn álemge tanytyp júrgen jandar barshylyq.
Adamnyń bala kúnindegi armany asqaq bolsa, ol ıesine soǵan qol jetkizgenshe maza bermeıdi. Maqsatqa jetý joly ońaı emes, degenmen shynaıy arman aldamaıdy. «Bizdiń maqtanyshymyz» aıdarynyń búgingi shyǵarylymynyń keıipkeri týraly osylaı deýge ábden bolady. Bul joly tanymal sportshy, aralas jekpe-jekten álem chempıony Shavkat Rahmonov, onyń osy kúnge deıingi jetistikteri jaıly sóz qozǵamaqpyz.
Shavkat Rahmonov 1994 jyly 23 qazaqstan Ózbekstannyń Shúrshi qalasynda týǵan. Aty-jóni men týǵan jerine qarap, kópshilik onyń ultyna qatysty sportshyny «ózbek» dep oılaıtyn bolýy kerek. Degenmen, Shavkattyń ulty qazaq, ákesi – qazaq, anasy – qońyrat.
Jarysqa qatysý, óziniń kúshin synaýǵa ol kishkene kúninen áýes boldy. Ol sporttyń ár túrimen aınalysqan – fýtboldan bastap, boksqa deıin. Bolashaq chempıondy negizinen kóshe tárbıeledi deýge bolar. Sebebi jastaıynan buzyqtaý ósken bala ózinen eresekteý balalarǵa da esesin jibermeıtin kórinedi.
Shavkat 16-ǵa kelgende ol otbasymen birge Qazaqstanǵa qonys aýdarady. Qaraǵandyǵa kóship kelgen onyń otbasynyń jaǵdaıy birden túzelip ketpedi. Ol kezdegi jasóspirim Shavkatqa ata-anasyna qolǵabys etip, jumys isteýge týra keldi. Bazarda júk tıeýshi bolyp aýyr jumys istedi. Degenmen, sportqa degen qyzyǵýshylyq oǵan da ýaqyt tabýǵa kúsh berdi. Kishkene kúninen jeńilý janyna jaqpaıtyn qaısar Shavkattyń ómirindegi bul qıyndyqtar ony qaıta shyńdaı tústi. Sportshy jumystan qatty qajyp, jattyǵý jasaýǵa murshasy kelmegen kezderdi de basynan ótken. Ondaı kezderde judyryǵyn túıgen kúıi jattyǵýdy qaldyrmaýǵa tyrysqan.
19 jasynda Shavkat Kókshetaý qalasynda jattyqtyrýshy Baıan Janǵalovpen jattyǵa bastaıdy. Keıin «Kókshe» akademıasyna dene shynyqtyrý jáne sport fakúltetine oqýǵa túsedi. Shavkattyń áýesqoı retindegi alǵashqy jetistikteri sol kezde-aq baıqala bastady. Sankt-Peterbýrgte aralas jekpe-jekten ótken chempıonattyń fınalynda ózbekstandyq Ahlıddın Mırzadovlatov basym túsip, Shavkat alǵashqy jeńisteriniń birine qol jetkizdi.
Bul jeńis M-1 Global promoýsheniniń nazaryna ózine aýdarýǵa jetkilikti boldy. 2014 jyly Shavkat olarmen kelisimshartqa otyrdy. Jartylaı ortasha salmaqta (77 kg) óner kórsetken Rahmonov alǵashqy jarystardan ózine nazar aýdarta bastady.
Shavkattyń jarqyn jeńisteri odan keıingi jyldary da jalǵasyn tapty. Rahmonovpen beldesken qarsylastarynyń bári birinen soń biri nokaýt aldy. 2018 jyldan bastap sportshy aralas jekpe-jekten Qazaqstan federasıasy ótkizgen kezdesýlerge de qatysa bastady. Sol jyldyń mamyr aıynda Shavkat Rahmonov jartylaı ortasha salmaqta qarsylasy Farıdýn Odılovty tehnıkalyq nokaýtpen utyp, KZMMAF chempıony tıtýlyna ıe boldy. Budan keıin jarty jyldan soń Shavkatqa qyrǵyz sportshysy Rınat Saıaqbaevpen kezdesip, chempıondyq beldigin qorǵaý kerek boldy. Bul beldesý nebary bes mınýtqa sozylǵan bolatyn, sebebi Shavkat taǵy bir qarsylasyn kózdi ashyp-jumǵansha nokaýtqa jiberdi.
2019 jyldyń naýryz aıynda jartylaı orta salmaqta M-1 Global-dyń vakantty tıtýlyn ıelendi. Úsh aıdan soń Rahmonovqa bul beldigin qorǵaý kerek boldy. Tıago Varejaomen ótken kezdesý qazaqtyń namysty jigiti Shavkattyń jeńisimen aıaqtaldy.
Rahmonovtyń lıgadaǵy debúti 2020 jyly qazan aıynda Ábý-Dabıde ótken UFC 254 týrnıriniń aıasynda ótti. Promoýshenǵa jańa kelgen Shavkatqa qarsylas retinde Aleks Olıveır tańdaldy. Jekpe-jek aralyq salmaqta ótti, óıtkeni brazılıalyq baqylaý salmaǵyn joǵaltyp aldy jáne qarsylastyń paıdasyna 20% aıyppul salyndy. Shavkattyń lıgadaǵy alǵashqy jekpe-jegi naǵyz sensasıa týdyrdy: ol qarsylasyn jeńýge tórt-aq mınýt ýaqyt jumsady.
Óziniń jarqyn debútinen keıin qazaqstandyq sportshy kelesi beldesýine promoýshenniń ańyzǵa aınalǵan myqtysy Donald Serroneni shaqyrdy.
«Maǵan amerıkalyq kovboıdy berseńizder. Men onymen erkin tóbelese alamyn. Ol meni eshqalaı qorqytyp turǵan joq. Ony qurmetteımin. Ol óte tájirıbeli kúresker. Ózimiz de ony beldesýlerin kórip óstik», - degen bolatyn Shavkat Rahmonov.
MMA-daǵy Shavkattyń ekinshi kezdesýi 2021 jyly maýsymda ótti. Bul joly qazaqstandyq aralas jekpe-jek sheberin brazılıalyq Mıshel Prazerısti de ońaı jeńdi. Nebary eki mınýtta Shavkat «artynan qylqyndyrý» ádisimen utty. Osylaısha, UFC-de Rahmonovtyń rekordy 2-0 bolsa, jalpy 14-0 boldy.
2022 jyldyń aqpan aıynyń basynda birde-bir ret jeńilip kórmegen qazaqstandyq sportshy Las-Vegasta UFC-degi úshinshi jekpe-jegin ótkizdi. Karlton Harrıs Rahmonovtyń qarsylasy bolyp taǵaıyndaldy. Jekpe-jektiń favorıti bolyp sanalǵan Shavkat birinshi raýndta qarsylasyna burylý kezinde aıaǵymen qatty soqqy berip, kezekti jeńisine qol jetkizdi.
2022 jyldyń naýryzynda Rahmonov UFC reıtıńinde promoýsheniń úzdik ondyǵyndaǵy Nıl Magnıdi kezdesýge shaqyrý tastady. Shavkattyń ózi bul reıtıńte 15-orynda bolatyn. Qazaqstandyq aralas jekpe-jek myqtysynyń shaqyrýyn qabyl aǵan amerıkandyqpen kezdesý sol jyly jazda ótti. Bul joly da Shavkattyń joly ońynan bolyp, qarsylasynan basym túsip, jeńiske jetti.
Shavkat Rahmonov óziniń sporttyq jolyndaǵy 17-shi, al UFC-degi 5-shi kezdesýin osy jyly naýryzda ótkizdi. Bul jolǵy onyń qarsylasy sol kezdegi álemdik reıtpngte 7-orynda turǵan Djeff Nıl boldy. Kezdesý nátıjesi Rahmonovty jeńilissiz kezdesýler sany boıynsha rekordsmen etti. Jekpe-jektiń statısıkasyndaǵy mańyzdy faktor onyń kóptegen jekpe-jekterdi merziminen buryn aıaqtaýymen de baılanysty boldy.
Búginge deıin 17 kezdesý ótkizip, onyń bárin jeńispen aıaqtaǵan Shavkat Rahmonovqa qandaı maqtaý aıtsa da artyq emes. Sporttaǵy onyń jetistigi osy joldaǵy, osy saladaǵy árbir janǵa úlgi.
Shavkat jetken jetistikter:
- 2018 — KZMMAF jartylaı orta salmaqtaǵy chempıony
- 2019 — jartylaı orta salmaqtaǵy M-1 Global chempıony
- 2022 – «Keshtiń qatysýshysy» (Karlston Harrıske qarsy)
- 2023 – «Jekpe-jek keshi» múshesi (Djeff Nılge qarsy)
- 2023 – jeńilissiz kezdesýler serıasy boıynsha UFC rekorsmeni
Tómende qazaqtyń maqtanashyna aınalǵan Shavkatqa qatysty qyzyqty derekterdi usynamyz:
- Shavkattyń atasynyń tegi – Rahman. Sportshynyń Rahmonovtarǵa aınalýy Ózbekstandaǵy AHAJ-dyń jibergen qateliginen.
- Sportshynyń laqap aty – Nomad, ıaǵnı qazaqshalap aıtqanda «kóshpendi». Óziniń sporttyq jolynda Shavkat birneshe el Reseıden Ońtústik Koreıaǵa deıingi birneshe elderde óner kórsetken.
- Shavkattyń ápkesi Sora - qoıan-qoltyq kúresten álem chempıony – qazir aralas jekpe-jekten de synǵa túsip júr.
- Shavkat bos ýaqytynda boks týrnırlary men fýtbol machtaryn kórgendi jaqsy kóredi.
- 2013 jyly áýesqoılar arasynda álem chempıony ataǵyn jeńip alǵannan keıin Rahmonov bala kezindegi kýmıri Fedor Emánenkomen kezdesti. Ataqty kúresker oǵan syılyqty jeke ózi tapsyrǵan bolatyn.