Prezıdent Qasym-Jomart Toqaev Túrki memleketteri uıymynyń XII samıtinde kıberqaýipsizdik jóninde Keńes qurýdy usyndy, dep habarlaıdy Aqshamnews.kz tilshsi Aqordanyń málimetine silteme jasap.
Memleket basshysy Azıadaǵy ózara is-qımyl jáne senim sharalary jónindegi keńestiń (AÓSSHK) túrki keńistigindegi turaqtylyq, qaýipsizdik jáne beıbitshilikti nyǵaıtýdaǵy biregeı róli men áleýetin joǵary baǵalady.
"Keńesti tolyqqandy halyqaralyq uıymǵa aınaldyrý úderisine qoldaý kórsetken Ázerbaıjan tarapyna, sondaı-aq barsha túrki memleketterine shynaıy rızashylyǵymdy bildiremin. Túrki elderiniń qaýipsizdikti nyǵaıtý jáne syn-qaterlerge, sonyń ishinde terorızmge qarsy turý jolyndaǵy maqsat-múddesi – ortaq, sondyqtan osy baǵyttaǵy yqpaldastyǵymyz tabysty júzege asýda. Bárimiz jahandyq qaýipsizdikti saqtaý jolyndaǵy bastamalardy qoldap kelemiz. Biraq biz munymen shektelip qalmaýymyz kerek", – dedi Memleket basshysy.
Qasym-Jomart Toqaev kóptegen elderdiń shekaraǵa baǵynbaıtyn jańa qatermen betpe-bet kelip otyrǵanyn alǵa tartyp, Uıym aıasynda Kıberqaýipsizdik keńesin qurýdy usyndy.
"Bul Keńes memleketterimizdiń is-qımylyn úılestirip, kúsh jumyldyrýǵa jaǵdaı jasaıdy. Sonymen qatar sıfrlyq qaýipsizdik pen tehnologıalyq baılanysty bekemdeı túsedi. Bıyl qyrkúıekte osy taqyryp boıynsha Almatyda ótken konferensıa nátıjeleri kıberqaýipsizdik salasyndaǵy yqpaldastyqty kúsheıtý asa mańyzdy ekenin taǵy da rastady", – dedi Prezıdent.