Qaıyrymdylyq maqsatqa jınalǵan qarajatty qara basynyń qamyna jumsady dep aıyptalǵan Perızat Qaırat jetekshilik etetin «Biz Birgemiz Qazaqstan 2030» qory taratylatyn boldy.
Bul týraly Ádilet mınıstrliginiń baspasóz qyzmeti taratqan málimette aıtylǵan, dep habarlaıdy aqshamnews.kz.
- Qaırat Perızat jetekshisi bolǵan «Biz Birgemiz Qazaqstan 2030» qoǵamdyq qoryn 2021 jyldyń 11 qazanynda Astana qalasynyń ádilet departamenti tirkegen.
14 aqpada Astana qalasyndaǵy aýdanaralyq mamandandyrylǵan ekonomıkalyq sotyna joǵaryda atalǵan birlestikti tirkeý qujattarynyń kúshin joıyp, májbúrli túrde taratý týraly talap aryz tústi. Sotqa talap aryz túsirýge Qarjylyq monıtorıń agenttiginiń «Biz Birgemiz Qazaqstan 2030» qoǵamdyq birlestigin tirkeý prosedýrasynyń kúshin joıý týraly bastamasy negiz boldy. Ol bastama birlestikti qurý kezinde zańnamanyń buzylýy jáne ol zań buzý faktilerin joıý múmkin emestigimen, ıaǵnı, zańdy tulǵany sot sheshimimen taratýǵa negiz bolatynymen baılanysty, - dep jazylǵan Ádilet mınıstrliginiń túsindirmesinde.