Búgin dástúrli onlaın tanystyrylym kezinde qala ákimi Baqytjan Saǵyntaev osylaı dedi.
Sonymen qatar qala basshysy el arasynda aıtylyp júrgen «qaıtadan onlaın oqý bolady eken» degen alypqashpa áńgimeniń de núktesin qoıdy, dep habarlaıdy Almaty-akshamy.kz tilshisi.
Balamyzǵa mektep kıimin alyp qoısaq, qaıtadan onlaınǵa aýysyp ketpeı me, mekteptiń qajettiligi de az shyǵyn emes qoı degen tyńdarman suraǵyna qala ákimi bylaı dep jaýap berdi:
«Biz balalardy bir jarym jyl onlaın rejımde oqyttyq, udaıy bulaı ustap otyra almaımyz. Memleket basshysy da, Úkimet te tapsyrma berdi, Bilim mınıstri de bıylǵy sabaq mektepte ótedi dedi. Demek, biz bıylǵy oqý jylyn offlaında bastaımyz. Qalanyń tıisti qyzmeti mektepti daıyndaýǵa kirisip ketti, dezınfeksıa jumystary da júrgizilip jatyr. Sondyqtan biz ádettegideı 1 qyrkúıekte oqýshylardy qarsy alýǵa daıynbyz».
Megapolıs basshysynyń aıtýynsha, barlyq mektepte Ashyq júıesi jumys istep turady.
«Ustazdardyń barlyǵy vaksınanyń eki komponentin de saldyrdy. Muǵalimderden bólek mektepte jumys isteıtin qyzmetkerdiń bári ekpe alýy kerek. Biraq ata-analar tarapynan da sondaı daıyndyq kerek, ata-analardyń barlyǵy ekpe saldyrǵan bolýy tıis. Deni saý ata-ananyń balasynyń da deni saý bolatynyn umytpaıyq», -dedi Baqytjan Ábdiruly.
Qala ákiminiń málimdeýinshe, belgili sanattaǵy oqýshylarǵa ákimdik tarapynan kómek te jasalyp jatyr.
«Mektepti daıyndaýmen qatar, jyldaǵydaı turmysy tómen otbasy balalaryn mektepke daıyndaý sharasyn da bastap kettik. «Mektepke jol» aksıasy aıasynda kómek kórsetiletin úıdiń balalarynyń ár aýdan ákimshiliginde tizimi bar. Ol balalardyń mektepke qajetti zattaryn alyp berý jumysy júrip jatyr», - dedi Almatynyń ákimi.