22,7 km sýmen qamtý jáne káriz jelisi júrgiziledi.
Almaty qalasy Túrksib aýdanyń úsh myńǵa jýyq turǵyny bıyl sý jáne káriz jelisine qosylady. Bul týraly qala ákimi Erbolat Dosaev aýdan turǵyndarymen kezdesý barysynda aıtty, dep habarlaıdy Almaty-akshamy.kz.
Ákimniń aıtýynsha, «Shýaqty», «Jas Qanat», "Tómengi besjyldyq" shaǵynaýdandarynda, sondaı-aq Zakarpatskaıa kóshesinde 138,2 km jeli salynýda (sýmen qamtý – 88,8 km, káriz – 49,4 km).
«Búgingi ýaqytta 62,2 km sýmen qamtý (35,6 km) jáne káriz (26,6 km) jelisi júrgizildi. Osy jyldyń sońyna deıin taǵy 22,7 km sýmen qamtý (13,7 km) jáne káriz (9,0 km) jelisin júrgizemiz.Nátıjesinde, bıyl «Shýaqty» jáne «Jas Qanat» shaǵynaýdandarynyń, sondaı-aq Zakarpatskaıa kóshesiniń 2,7 myń turǵyny ortalyqtandyrylǵan sýmen qamtý jáne káriz jelisine qosylady. "Tómengi besjyldyq" shaǵynaýdanynda jelilerdiń qurylysy 2023 jyly aıaqtalady. Búginde jumystardyń 40%-ti oryndaldy, 98,4 km jeliniń (sýmen qamtý – 66,5 km, káriz – 31,9 km) 40 km-i (sýmen qamtý – 27 km, káriz – 13 km) salyndy»,- dedi Erbolat Dosaev.
Osylaısha, 2023 jyldyń İİİ toqsanynda "Tómengi besjyldyq" shaǵynaýdanynyń 16 myń turǵyny qalalyq jelilerge qosylatyn bolady.
«Álmerek», «Qaırat», «Maıak» shaǵynaýdandaryna 55,8 km jeli júrgizý úshin jobalaý-smetalyq qujattama ázirleý aıaqtaldy. Onyń ishinde – 30,7 km sýmen qamtý jáne 25,1 km káriz jelileri. Qurylys-montajdaý jumystaryn 2023 jyldyń II toqsanynda bastaýdy josparlap otyrmyz»,- dedi ákim.
Erbolat Dosaevtyń aıtýynsha, ótken kezdesýde kóterilgen máselelerdi eskere otyryp, ortalyq sý burý jelisi joq aýdannyń 7 ýchaskesine (9,5 myń úı) tekserý júrgizildi. 2023 jyldyń İV toqsanyna deıin osy máseleni sheshý úshin káriz jelisin salýǵa jobalaý-smetalyq qujattama ázirlenetin bolady.