Mınıstrliktiń málimetinshe, ortasha baldyń ósýine oqýǵa túsýshilerdiń UBT tapsyrýǵa 2 múmkindiginiń bolýy áser etken.
Bul týraly aıtqan QR Bilim jáne ǵylym vıse-mınıstri Qýanysh Erǵalıevtiń aqparaty boıynsha, bıyl Ulttyq biryńǵaı testileýden 1900-den astam ǵana talapker 120 baldan joǵary jınaı aldy, dep habarlaıdy Almaty-akshamy.kz
«Ulttyq biryńǵaı testileýge naqty 145 288 talapker qatysty. Onyń ishinde 75,5 paıyzy qazaq tilinde, 24,3 paıyzy orys tilinde jáne 350 adam, ıaǵnı 0,2 paıyzy aǵylshyn tilinde tapsyrdy. Bıyl UBT-nyń ortasha baly 69,08 bal boldy. Ótken jylmen salystyrǵanda ortasha bal 5 balǵa artty. Al shekti baldy 65 paıyzy jınady jáne 39,4 paıyzy shekti baldan óte almady», - dedi vıse-mınıstr mınıstrliktiń apparat jınalysynda.
«Osylaısha olar óz nátıjelerin jaqsartý úshin daıyndalýǵa múmkindik aldy. Sonymen qatar elektrondy formatty engizý arqyly talapkerlerdiń jaýaptaryn túzetýge, test tapsyrmalaryn sheshýge ýaqyt jetkilikti boldy. 1 923 túsýshi 120 baldan joǵary aldy. Eń joǵary bal – 140 baldy bir talapkerimiz jınady. Ol - Pavlodar qalasynan Danıar Ýálıev degen oqýshy. Byltyrǵymen salystyrǵanda, eń joǵary bal 139 boldy. Ony da bir talapker jınady», - dedi Qýanysh Erǵalıev.